Një tjetër tentativë e negociatorëve për të bindur 35-vjeçarin të dorëzohet është zhvilluar pak minut...
AKTUALITET
Denoncimi/ Si vjedh Ryanair pasagjerët në aeroportin e Rinasit pa faturë fiskale!
PiranjatPërditësimi i fundit 25 Maj 2026, 10:46
Një denoncim ka mbërritur nga një pasagjer në lidhje me kompaninë ajrore Ryanair, këtë herë në lidhje me gjobat e vendosura për bagazhet e dorës.
Sipas qytetarit, ai është detyruar të paguajë 60 euro shtesë për një valixhe të vogël, e cila në aeroporte të tjera të Europës është lejuar pa asnjë problem brenda në kabinë. Pasagjeri pretendon se e njëjta valixhe është përdorur në udhëtime të tjera jashtë Shqipërisë dhe nuk është konsideruar asnjëherë jashtë standardit.
Ai ngre gjithashtu shqetësimin se pagesa është marrë në aeroport pa iu dhënë faturë fiskale apo dokument tatimor, duke shtuar dyshimet mbi mënyrën se si po aplikohen këto tarifa ndaj qytetarëve.
Një praktikë e tillë ngre pikëpyetje serioze mbi transparencën financiare dhe respektimin e detyrimeve ligjore ndaj konsumatorëve. Qytetarët shprehen se ndihen të zhvatur në sportelet e aeroportit, pasi përballen me pagesa të menjëhershme, nën presionin e humbjes së fluturimit, ndërsa në fund nuk marrin asnjë dokument zyrtar që provon transaksionin e kryer. Për shumë pasagjerë, kjo nuk duket më si zbatim rregullash, por si një mënyrë abuzive për të nxjerrë para shtesë nga udhëtarët.
Kjo situatë ka sjellë reagime të shumta nga udhëtarët, të cilët kërkojnë transparencë mbi mënyrën e aplikimit të rregullave për bagazhet, por edhe mbi procedurat financiare të ndjekura në aeroportin e Rinasit nga kjo kompani.
Ndërkohë, mbetet e paqartë nëse kontrolli përmasave të bagazheve po zbatohet me standard të njëjtë në të gjitha aeroportet ku operon kompania, apo nëse në Shqipëri po përdoret një praktikë më e ashpër ndaj pasagjerëve./Piranjat News
