Inspektorati i Lartë i Drejtësisë i është drejtuar Gjykatës Kushtetuese me kërkesën për fillimin e procedimit dis...
AKTUALITET
Dosja “Toyota Yaris”, GJKKO dërgon për gjykim biznesmenin Astrit Vladi dhe Eriona Daupajn
PiranjatPërditësimi i fundit 25 Qershor 2026, 16:32
Gjykata e Posaçme kundër Korrupsionit dhe Krimit të Organizuar ka vendosur të dërgojë për gjykim çështjen penale ndaj Astrit Vladit dhe Eriona Daupajt, të cilët akuzohen për vepra penale që lidhen me ushtrimin e ndikimit të paligjshëm dhe korrupsionin në sistemin e drejtësisë.
Vendimi është marrë në seancën paraprake të datës 25 qershor 2026, pasi gjykata shqyrtoi kërkesën e Prokurorisë së Posaçme (SPAK) për dërgimin e çështjes në gjykim. Sipas akuzës, Astrit Vladi akuzohet për “ushtrim të ndikimit të paligjshëm ndaj personave që ushtrojnë funksione publike”, kryer në bashkëpunim dhe në disa raste, si dhe për “korrupsion aktiv të gjyqtarit, prokurorit dhe funksionarëve të tjerë të drejtësisë”.
Ndërsa Eriona Daupaj akuzohet për “ushtrim të ndikimit të paligjshëm ndaj personave që ushtrojnë funksione publike”, “zbulim të akteve ose të dhënave sekrete” dhe “korrupsion pasiv të gjyqtarëve, prokurorëve dhe funksionarëve të tjerë të organeve të drejtësisë”. Hetimet lidhen me ngjarje të vitit 2020, kur Astrit Vladi dyshohet se i ka kërkuar avokates Lazimi të ndikonte te një gjyqtar që po shqyrtonte çështjen penale ndaj vëllait të tij, Elvis Vladi. Sipas SPAK, Lazimi ka pranuar të ndërmjetësojë kundrejt përfitimeve monetare të parregullta.
Emri i Lazimit doli gjatë hetimeve të dosjes së njohur si “Toyota Yaris”, një prej çështjeve më të bujshme të viteve të fundit. Skandali shpërtheu pasi në vitin 2018 u sekuestruan rreth 3.4 milionë euro të fshehura në dy automjete tip Toyota që kishin mbërritur nga Belgjika në Shqipëri.
Dosja “Toyota Yaris” ka sjellë më herët edhe dënimin e ish-kryeprokurores së Vlorës, Aurela Zarka, si dhe avokatit Radovan Çela.
