Kryeministri në detyrë i Kosovës, Albin Kurti, ka reaguar ndaj ceremonisë me nderime shtetërore të organizuar në Serbi p&eu...
AKTUALITET
Dy operatorë ankimojnë tenderin 3.9 milionë euro të OBP për sistemet e Doganave
PiranjatPërditësimi i fundit 16 Qershor 2026, 07:56
Tenderi me vlerë rreth 3.9 milionë euro për modernizimin e infrastrukturës IT të Doganave është ankimuar së fundmi në Komisionin e Prokurimit Publik nga dy operatorë ekonomikë.
Procedura u hap më 4 qershor nga Operatori i Blerjeve të Përqendruara, me fond limit 387 milionë lekë (rreth 3.9 milionë euro) dhe ka në fokus përmirësimin e infrastrukturës hardware të sistemeve doganore dhe rrjeteve fizike.
Arsyeja e ankimimit sipas klasifikimit lidhet me dokumentet e tenderit. Ankimimet në këtë fazë zakonisht kanë të bëjnë me kushtet e pjesëmarrjes, specifikimet teknike ose kriteret e tjera të përcaktuara në dokumentacionin e garës.
Sipas dokumenteve të tenderit, projekti parashikon zëvendësimin e serverëve, sistemeve të ruajtjes së të dhënave dhe pajisjeve të rrjetit që janë amortizuar ose kanë dalë jashtë mbështetjes së prodhuesve.
Investimi prek sistemet kryesore të Doganave, përfshirë Asycuda World, LIMS, SEED, AlphaWeb dhe platforma të tjera që përdoren për operacionet doganore dhe tarifore. Paketa përfshin 16 serverë virtualizimi, dy sisteme storage, katër SAN switch-e, pajisje backup, software virtualizimi dhe backup-i, firewall-e qendrore dhe për degët doganore, switch-e qendrore, platformë për analizimin e log-eve dhe load balancer.
Kontrata parashikon ngritjen e një infrastrukture me dy site, një primar dhe një sekondar, për garantimin e vazhdimësisë së shërbimit dhe rikuperimin në rast incidentesh.
Tenderi përfshin gjithashtu elementë për forcimin e sigurisë kibernetike dhe përmirësimin e komunikimit mes qendrës dhe degëve doganore, përmes arkitekturës SD-WAN, firewall-eve të avancuara dhe monitorimit të centralizuar të ngjarjeve të sigurisë.
Sipas dokumentacionit, projekti lidhet edhe me nevojën për të mbështetur sisteme të reja si NCTS dhe NSW, të cilat pritet të rrisin volumin e të dhënave dhe kërkesat për kapacitete procesuese. Afati i zbatimit është 12 muaj, ndërsa mirëmbajtja pas implementimit parashikohet për 24 muaj./ Monitor
