Kreu i degës së Partisë Demokratike në Krujë, Aulon Kalaja, ka denoncuar publikisht presione të dyshuara të policisë n...
AKTUALITET
Çmontohet “banda e makinave” në Athinë, 11 shqiptarë mes të arrestuarve
PiranjatPërditësimi i fundit 15 Qershor 2026, 21:35
Policia greke ka goditur një organizatë kriminale të specializuar në vjedhjen, falsifikimin dhe shitjen e automjeteve në zona të ndryshme të Athinës, duke arrestuar 13 persona, mes tyre 11 shtetas shqiptarë dhe 2 grekë.
Operacioni u zhvillua në orët e para të mëngjesit nga Departamenti i Hetimit dhe Ndjekjes së Krimeve Spata-Artemis, me mbështetjen e forcave të tjera policore, pas një hetimi të gjatë që zbardhi aktivitetin e grupit kriminal.
Sipas autoriteteve greke, të arrestuarit, të moshës nga 22 deri në 38 vjeç, akuzohen për krijim dhe pjesëmarrje në organizatë kriminale, vjedhje të automjeteve në bashkëpunim, falsifikim dokumentesh, mashtrim dhe pastrim parash.
Hetimet kanë zbuluar se grupi vepronte që prej marsit të vitit 2023. Anëtarët e tij vidhnin automjete në zona të ndryshme të Athinës, më pas manipulonin të dhënat identifikuese të mjeteve duke hequr pjesët origjinale me numrat e shasisë dhe duke i zëvendësuar me numra të falsifikuar.
Në këtë mënyrë, automjetet e vjedhura “legalizoheshin” dhe nxirreshin në treg për t’u shitur si mjete të rregullta.
Po ashtu, policia zbuloi se anëtarët e organizatës deklaronin në mënyrë të rreme vjedhjen e automjeteve për të përfituar dëmshpërblime nga kompanitë e sigurimit, duke siguruar fitime të paligjshme.
Gjatë hetimeve disamujore u sekuestruan gjithsej 36 automjete. Nga këto, 19 rezultuan të vjedhura dhe me dokumente të falsifikuara, ndërsa iu kthyen pronarëve të ligjshëm pas verifikimeve teknike.
Në kontrollet e kryera në banesat e të arrestuarve, policia sekuestroi 6 automjete, pajisje për kopjimin e çelësave të makinave, sisteme diagnostikuese ECU, mjete speciale për hapjen e bravave, pajisje gjeolokacioni, dhjetëra telefona celularë dhe kompjuterë, dy pistoleta imituese, një thikë palosëse, si dhe rreth 30 mijë euro para cash.
Autoritetet greke kanë dokumentuar deri tani 33 raste të vjedhjes së automjeteve dhe 9 raste të deklarimeve të rreme për vjedhje.
Sipas vlerësimeve të policisë, organizata kriminale ka përfituar rreth 1 milion euro nga aktiviteti i saj i paligjshëm.
Të arrestuarit janë dërguar para prokurorisë kompetente, ndërsa hetimet vijojnë për zbardhjen e plotë të aktivitetit kriminal të grupit.
