Ekzekutimi e biznesmenit Ardian Nikulajt, dërgohet për gjykim vrasësi portugez Ruben Saraiva

saraiva, nikulaj

LEZHË- Gjykata e Lezhës ka dërguar për gjykim shtetasin portugez, Ruben Saraiva i akuzuar si personi që ekzekutoi biznesmenin Ardian Nikulaj në lokalin e tij në Shëngjin.

Vendimi u mor nga gjyqtari Renis Sheshi, ndërsa Saraiva do të përballet në gjykatë për veprat penale të vrasjes me dashje për interes sipas nenit 78/2 e 25 te Kodit Penal dhe armëmbajtje pa leje sipas nenit 278/1 të Kodit Penal. Sipas Gjykatës, rezulton të ketë prova mjaftueshëm për t’u gjykuar për këto vepra.

Ardian Nikulaj u vra më 19 prill brenda lokalit të tij në Shëngjin. Porositës dhe organizator është Edmond Haxhia i cili ka rënë në pranga, së bashku me tre britanikë Thomas Mithan, Steve Hunt dhe Harriet Bridgeman. Të katër këta janë prangosur, pasi autoritetet britanike kanë pranuar si të ligjshme kërkesën e bërë nga Policia e Shtetit. 

Portugezi Ruben Saraiva u largua nga Shqipëria përmes Doganës së Kapshticës, bashkë me britanikun Harry Simson, në drejtim të Greqisë. Ai u ekstradua në Shqipëri me 31 dhjetor të vitit 2023, pas vendimit të Gjykatës së Marokut e cila pranoi kërkesën e autoriteteve shqiptare. Prej asaj kohe ai po qëndron në paraburgim.

Nga ana tjetër, britanikët dyshohet se kanë qenë informatorë, dhe kanë qëndruar pikërisht në resortin në pronësi të biznesmenit Ardian Nikulaj dhe sipas hetuesve, ata kanë vëzhguar për ditë me radhë lëvizjet e tij dhe të stafit, të cilat më pas ia raportonin portugezit Ruben Saraiva.

ardian nikulaj ruben saraiva