Sot vendi ynë do të jetë nën ndikimin e masave ajrore relativisht të qëndrueshme dhe të nxehta.
Moti parashikohet kryesish...
AKTUALITET
Kredia e re për ekonominë shënoi një rekord të ri vitin e kaluar
n.fPërditësimi i fundit 5 Shkurt 2025, 17:01
TIRANË- Kredia e re për ekonominë arriti një rekord të ri historik vitin e kaluar. Sipas të dhënave nga Banka e Shqipërisë, vlera e kredisë së re të disbursuar arriti në 379.8 miliardë lekë, në rritje me 19% krahasuar me vitin 2023. Rritja e kredisë së re ishte edhe më e lartë krahasuar me nivelin prej 14.5% të vitit 2023.
Viti 2024 u karakterizua i gjithi nga ritme të larta të kreditimit të ekonomisë dhe dhjetori solli një shumë të re rekord të kredisë mujore. Sektori bankar disbursoi 47.8 miliardë lekë kredi të reja për ekonominë në muajin dhjetor 2024, që përfaqëson vlerën më të lartë historike të kredisë mujore të dhënë nga sektori bankar.
Shtysa kryesore për rritjen e kredisë gjatë 2024 erdhi nga segmenti i biznesit. Sipas Bankës së Shqipërisë, kredia e re për bizneset vitin e kaluar arriti shumën e gati 269 miliardë lekëve, me një rritje prej 24% krahasuar me një vit më parë. Kredia për biznesin ka shfaqur rritje pozitive në të gjitha segmentet, por ritmet më të larta janë shënuar në kredinë për pasuri të paluajtshme.
Edhe segmenti i individëve sidoqoftë vazhdoi rritjen me ritme të larta dyshifrore. Vitin e kaluar, sektori bankar disbursoi pothuajse 107 miliardë lekë kredi të re për individët, në rritje me 16.1% krahasuar me një vit më parë.
Megjithëse shifrat e kredisë së re përfshijnë edhe rifinancime të kredive të maturuara ose zhvendosje të kredive ekzistuese në banka të tjera, të dhënat pozitive për ecurinë e kreditimit konfirmohen edhe nga ecuria e kredisë, e matur si tepricë.
Portofoli i kredisë për ekonominë në fund të vitit 2024 arriti vlerën e 835.6 miliardë lekëve. Vetëm gjatë muajit dhjetor, vlera e portofolit u rrit me më shumë se 11 miliardë lekë. Me bazë vjetore portofoli total i kredisë u rrit me 12.3%.
Rritja e portofolit pothuajse u trefishua në raport me rritjen e vitit të kaluar. Kjo është rritja më e lartë e portofolit të kredisë në 15 vitet e fundit. Rritja vjetore e portofolit total për bizneset ishte 11.4%, ndërsa për individët rritja ishte 13.5%.
Sipas monedhës, rritja e kredisë edhe vitin e kaluar u mbështetet sidomos nga financimet në monedhën vendase. Portofoli i kredisë në lekë vitin e kaluar u rrit me 14.3% dhe përbënte 56.2% të portofolit të kredisë për ekonominë, nga 55.2% që zinte një vit më parë.
Megjithatë, vitin e kaluar edhe kredia në valutë e përmirësoi ndjeshëm rritjen, me 9.5% më shumë krahasuar me një vit më parë. Nëse marrim në konsideratë efektin e kursit të këmbimit, rritja e kredisë në valutë dhe e kredisë për ekonominë në tërësi do të kishte qenë edhe më e lartë. Sipas shifrave të Bankës së Shqipërisë, kursi mesatar i këmbimit të euros me lekun vitin e kaluar ra më tej me 7.4% krahasuar me vitin 2023./ Monitor
