Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
AKTUALITET
Mashtrimet me qiratë e avionëve të “Air Albania”, Sinan Idrizi fsheh në Turqi gruan dhe vajzën që ishin ortaket kryesore të kompanisë
PiranjatPërditësimi i fundit 1 Tetor 2025, 14:19
Një skandal ka demaskuar kompaninë ajrore shqiptare “Air Albania”, e cila pas shtatë vitesh operimi, ndodhet nën hetim për mashtrim financiar dhe borxhe të pashlyera që arrijnë në miliona euro. Dy ortaket kryesore të kompanisë, Najada dhe Rejana Idrizi, bashkëshortja dhe vajza e Sinan Idrizit, mësohet se janë larguar nga Shqipëria dhe po qëndrojnë të fshehura në Stamboll, në përpjekje për të shmangur përballjen me drejtësinë.
Bëhet me dije, se largimi i tyre lidhet me akuzat për mashtrime të përsëritura ndaj disa prej kompanive më të njohura ajrore ndërkombëtare, të cilave nuk u janë shlyer detyrimet për avionët e marrë me qira që prej vitit 2018.
Najada dhe Rejana Idrizi zotërojnë 41% të aksioneve në “Air Albania” përmes kompanisë “MDN Investment Sh.p.k”, ndërsa partnerët e tjerë janë “Turkish Airlines” me 51% dhe “Albcontrol” me 10%. Megjithatë, sipas dosjeve të kompanive të dëmtuara, skema mashtruese dyshohet të jetë drejtuar nga vetë Sinan Idrizi, në bashkëpunim me drejtues të “Turkish Airlines”.
Një nga rastet më të rënda është ai i kompanisë “Gat Aircraft and Engine Leasing Limited”, degë e grupit amerikan “GA Telesis”, e cila ka ngritur padi penale në Gjykatën e Lartë të Anglisë kundër “Air Albania” dhe “Turkish Airlines”, duke i akuzuar për mashtrim në kontratat e qirasë për dy avionë “Airbus A320-200”.
Ndërkohë, në gusht 2025, edhe kompania ajrore “Etihad” bllokoi dy avionë të tjerë të “Air Albania”, duke kërkuar gjithashtu ndjekje penale për shkelje kontratash dhe mospagim të qirasë.
Sipas informacioneve, familja Idrizi ka ngritur një bazë veprimi në Stamboll, ku dyshohet për lidhje me rrjete mafioze nga Turqia, Qiproja, Izraeli dhe vendet arabe. Dyshohet se qëndrimi i Najadës dhe Rejanës në Stamboll është një përpjekje për të shmangur arrestimin dhe përgjegjësitë ligjore për aktivitetet e kompanisë.
Historiku i kompanisë “MDN Investment” zbulon një skemë të dyshimtë të transferimit të aksioneve, e themeluar më 3 maj 2018, kompania fillimisht u kontrollua nga Sinan Idrizi, i cili më 17 korrik të po atij viti i transferoi 54% të aksioneve gruas dhe vajzës, dhe 23% izraelitit Ron Yeffet, i njohur për aktivitetet në tregun e armëve. Vetëm një muaj më pas, aksionet e Yeffet dhe Idrizit iu kaluan tërësisht Najadës dhe Rejanës, duke i kthyer në pronare 100% të “MDN Investment”.
Kjo manovër, mund të themi me bindje se është pjesë e një strategjie të pastër dhe të qartë, për t’u shmangur përgjegjësive penale dhe financiare.
Thënë këto, ky skandal rrezikon të fundosë jo vetëm “Air Albania”, por edhe të përfshijë në hetime strukturat shtetërore shqiptare që kanë bashkëpunuar me kompaninë në këto vite.
