Pas paraqitjes së fjalës përfundimtare nga kryeprokurorja Kimberly West dhe prokurori i rastit, Prokuroria e Specializuar në Hagë ka ...
AKTUALITET
“Mos e prekni makinën time”/ Karamuço: Krimi i organizuar sfidon shtetin edhe pas sekuestrimit të pasurive
PiranjatPërditësimi i fundit 26 Maj 2026, 08:33
Nga krijimi i tij në 2019, SPAK ka sekuestruar 64 pasuri të paluajtshme, 26 pasuri të luajtshme, 11 subjekte tregtare nga të cilat 7 subjekte të sekuestruar plotësisht dhe kuotat përkatëse të personave nën hetim për 4 subjekte të tjerë.
Në momentin që sekuestrohen, Agjencia e Administrimit të Pasurive të Sekuestruara dhe të Konfiskuara, i publikon dhe shumica e tyre jepet me qira. 3982 pasuri dhe prova materiale, të cilat përfshijnë kryesisht apartamente, njësi shërbimi, toka dhe automjete janë sot nën mbikëqyrje nga ky institucion.
Eksperti i Kriminalistikës Ervin Karamuço, i ftuar në ‘Top Story’ ka shpjeguar se si funksionojnë pasuritë dhe asetet e grupeve kriminale, dhe çfarë ndodh pas sekuestrimit të tyre.
Karamuço: Kemi edhe ne raste në Shqipëri që janë vendosur, fitore për asetet kriminale. Kemi një rast ku një eksponent i krimit të organizuar kishte apeluar policinë “mos e prekni makinën time”. Një nga drejtuesit e policisë bëri kërkesë, mori makinën dhe sot ai qarkullon me atë makinë si një formë demonstrimi që “ligji jam unë dhe jo ti”.
Janë me qindra vila në Itali, gjysma janë të braktisura, nuk u afrohet askush as për projekte sociale. Kemi një shoqatë të madhe aty, ajo e tokave të lira. Asaj çdo vit i digjen tokat, i dëmtohen mjetet, shkojnë organizata, zjarrvënie të tokave, pemtarisë, mjeteve. Kjo ka filluar herët. Personi i cili propozoi për herë të parë ligjin, Torre, ai u vra. Atë ligj e kemi dhe ne sot për parandalimin, sekuestrimin, në përgjithësi për krimin e organizuar me asete pasurore.
Gazetari Elton Qyno u shtoi se shqiptarët tashmë janë fokusuar te pasuritë e pastra, duke u siguruar që të mos blejnë një pasuri, pronari i të cilit mund të jetë në konflikt me shtetin apo persona të tjerë.
Qyno: Në çdo pasuri, shqiptarët kanë një trend që nuk blejnë një pasuri që është në konflikt me shtetin apo individin. Kohën e fundit janë fokusuar te pasuritë e pastra. Fakti që ti shkon e blen një apartament të një eksponenti të krimit të organizuar, ke hyrë në konflikt me të dy këmbët e tyre. Ka dhe shumë njësi tregtare që edhe pse shteti i nxjerr në ankande, vetë personat që i blejnë apo i marrin me qira janë pronarët që i marrin me emra të tjerë. Ata i blejnë për herë të dytë, por nuk heqin dorë nga pasuria e tyre.
Karamuço: Është një fenomen, ai e ka makinën aty e di që do ia marrin me vendim gjykate, ai i merr çelësin dhe makinën e lë aty. Në momentin kur makina është pa çelës, ti i gjen një kod apo i bën një çelës të ri, ajo makinë po doli që andej, ai e vjedh makinën dhe ia kërkon dëmin shtetit, ka dhe të tilla forma.
