Përplasje në GJKKO mes Dumanit dhe ish-miqve të tij/ Gentian Sharra: Është qenie e shpifur! Asllan Plaku: Ka kërkuar 700 mijë euro për të ndryshuar dëshmitë

nuredin dumani

TIRANË- I penduar i drejtësisë, Nuredin Dumani po dëshmon edhe ditën e sotme në Gjykatën e Posaçme lidhur me ngjarje kriminale që kanë tronditur vendin. Në seancën e sotme, Dumani ka thënë se i kanë çuar fjalë njerëz në burg që të ndërronte dëshminë per Gent Sharrën dhe Suel Çelen, kundrejt qindra mijëra eurove. Kjo deklaratë e tij ka sjellë përplasje në sallën e gjyqit me Asllan Plakun dhe Gentian Sharrën.

"Ky është një qenie e shpifur sajon gjera, përmend dhe emra, jo Emiliano Shullazi e ku di unë. Që s’kanë lidhje me këtë çështje." tha Sharra duke iu drejtuar Dumanit. Edhe Asllan Plaku deklaroi në seancë se ka qenë Nuredin Dumani ai që i ka kërkuar Gent Sharrës 200 mijë euro dhe Suel Çelës 500 mijë euro për të ndryshuar dëshminë.

Nuredin Dumani, një nga emrat më të përfolur në botën e krimit, u vu në pranga  mbrëmjen e 29 Marsit të vitit 2022 në Fier, pak pasi kishte marrë mjekim për plagosje në shpinë nga tre mjekë në një shtëpi private. Pas burgosjes, Dumani u bë bashkëpunëtor i drejtësisë dhe dëshmitë e tij kanë zbuluar disa nga ngjarjet më të rënda kriminale në vendin tonë.

Në seancën e djeshme, Dumani ka dëshmuar për vrasjen e Bujar Çelës, vëllait të Talo Çelës dhe për arsyet që vendosi ta ekzekutonte. Ai ka rrëfyer se vrasja e Çelës ishte vendosur ditën kur i kanë vrarë shokun e fëmijërisë, Klevis Kapllanin. Dumani ka treguar se ia dinte lëvizjet dhe se ku e pinte kafen çdo ditë. Këto informacione, ai shtoi se ia siguronte Elio Bitri.  Ai foli edhe për vrasjen e Emiljano Ramazanit, ku tha se bënte palestrën afër shtëpise dhe kishte informacion për hyrjet dhe daljet e tij. Ai tha se Erjon Alibej i niste fotot e Ramazanit në SKY dhe se ishte ai që komunikonte direkt me informatorin që kishin në Elbasan, Xhuljano Hoxhën. 

nuredin dumani gentian sharra asllan plaku