DASHI Ka ende disa tensione në punë që po ju pengojnë të çoni përpara projektet ashtu siç dëshironi. Nuk ju m...
AKTUALITET
PIRANJAT publikuan rastin e aksidentit të 55 vjeçarit gjatë punës, policia arreston tre personat përgjegjës
PiranjatPërditësimi i fundit 4 Mars 2026, 12:24
Policia e Gjirokastrës ka arrestuar tre shtetas Pano Çako, 46 vjeç, Arben Baxha, 61 vjeç dhe Ardian Loloci, 58 vjeç, me detyrë "Përgjegjës" në Sektorin e Mirëmbajtjes në Drejtorinë e Shërbimeve Komunitare për shkeljen e rregullave në punë.
Piranjat News publikuan ditën e djeshme rastin e 55 vjeçari që ra nga ndërtesa ku ishe duke punuar dhe aktualisht ndodhet nën kujdesin e mjekëve. Menjëherë ditën e sotme policia ka arrestuar personat që mbajnë përgjegjësi për ngjarjen.
Si pasojë e aksidentit, punëtori është marrë në kujdes intensiv nga mjekët tek Trauma, pasi gjendja e tij është e rëndë.
"Rasti ka ardhur, po ndiqet në mënyrë intensive nga ekipi mjekësor, për gjendjen shëndetësore nuk mund të themi dot gjë ende, pasi po vijon me ekzaminimet", bëjnë me dije burime zyrtare nga Trauma, për Piranjat News.
Ndërkohë nuk ka asnjë një reagim nga Bashkia Gjirokastër e cila ka shkelur kontratën fillestare duke rrezikuar jetën e punëtorëve. Duke i detyruar të pastronin për llogari të Bashkisë.
Njoftimi i policisë:
Drejtoria Vendore e Policisë Gjirokastër
•Specialistët për Hetimin e Krimeve të Komisariati i Policisë Gjirokastër arrestuan në flagrancë shtetasit P. Ç., 46 vjeç, A. B., 61 vjeç dhe A. L., 58 vjeç, të tre banues në Gjirokastër, me detyrë "Përgjegjës" në Sektorin e Mirëmbajtjes në Drejtorinë e Shërbimeve Komunitare, Gjirokastër, të dyshuar për veprën penale “Shkelja e rregullave të mbrojtjes në punë”.
Veprimet procedurale u kryen pasi më datë 03.03.2026, rreth orës 13:30, në lagjen “Zinxhira”, gjatë punës për pastrimin e një objekti, një punonjës 55 vjeç, dyshohet se ka rënë aksidentalisht nga kati i dytë i objektit, dhe aktualisht është në kujdesin e mjekëve.
Më tej, në lidhje me këtë rast është shpallur në kërkim Drejtori i Drejtorisë së Shërbimeve Komunitare, Gjirokastër, i dyshuar për veprën penale “Shpërdorimi i detyrës”, shtetasi A. O., 54 vjeç, banues në Gjirokastër, pasi nuk është paraqitur të jap shpjegime dhe të vërë në dispozicion dokumentacionin e nevojshëm për hetimin e plotë të këtij rasti.
Gjithashtu, në lidhje me rastin është njoftuar Inspektoritati i Punës.
Vijon puna për dokumentimin e plotë të përgjegjësive të shtetasve të dyshuar për këtë ngjarje.
•Gjithashtu, specialistët për Hetimin e Krimeve të Komisariatit të Policisë Gjirokastër referuan materialet në Prokurori, ku nisi procedimi penal për shtetasin A. Sh., 48 vjeç, banues në Gjirokastër, pasi ka ndotur ambientin, dyshohet duke djegur mbetje metalesh, në subjektin e tij.
•Specialistët për Hetimin e Narkotikëve, në bashkëpunim me shërbimet e Komisariatit të Policisë Gjirokastër lokalizuan dhe kapën shtetasin e shpallur në kërkim, Y. P., 47 vjeç, banues në fshatin Zhulat, i cili është dënuar nga Gjykata e Gjirokastrës, me 6 vjet burgim, për veprat penale "Prodhimi dhe shitja e narkotikëve" dhe "Dhuna në familje". Nga dënimi, 47-vjeçarit i kanë mbetur për të vuajtur 6 muaj e 27 ditë burgim.
•Specialistët për Hetimin e Krimeve të Stacionit të Policisë Memaliaj referuan materialet në Prokurori, ku nisi procedimi penal për shtetasin F. Sh., banues në Sarandë, pasi dyshohet se ka penguar lëvizjen në fshatin Kalivaç, duke lënë automjetin në rrugë.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.
