Kryeministri Edi Rama ka përsëritur thirrjen e tij për dialog me protestuesit, duke zgjedhur një formë simbolike për të p&e...
KOSOVA
EMRI/ Iu kapën tre shqiptarëve në doganën e Merdarës, del emri i pronarit të 1 milion eurove
PiranjatPërditësimi i fundit 23 Tetor 2026, 23:17
Pas më shumë se gjysmë viti, afera ku 1 milion euro të kapura në kufi rezultuan me disa shtetas të Shqipërisë të arrestuar, por nuk u mbajtën në paraburgim, ka marrë kthesë të re.
Është lajmëruar një person i tretë që ka marrë përsipër pronësinë e këtyre parave.Bëhet fjalë për Fatlind Akifin, i cili më 23 tetor është paraqitur në Prokurorinë Speciale, duke deklaruar se e gjithë shuma i përket atij.
Më 24 shkurt 2026, në pikën kufitare të Merdarës, gjatë kontrollit të një automjeti Mercedes Sprinter, me ngjyrë të bardhë dhe targa të Shqipërisë, në të cilin ndodheshin tre persona, zyrtarët zbuluan një hapësirë të modifikuar brenda automjetit.
Kontrolli më i detajuar nxori në pah një shumë marramendëse parash – plot një milion euro, të fshehura në atë hapësirë.
Paratë u sekuestruan, ndërsa rasti iu kalua hetuesve të krimeve ekonomike, të cilët, me autorizim të Prokurorisë Speciale, nisën hetimet për dyshimet lidhur me prejardhjen dhe transportimin e tyre.
Tetë muaj më vonë, në këtë rast doli në skenë edhe Fatlind Akifi.
Siç mëson Sinjali, gjatë intervistimit më 23 tetor, në prani të avokatit mbrojtës, Akifi deklaroi se shuma prej një milion eurosh i përket atij.
Megjithatë, sipas informacioneve nga hetimet, 33-vjeçari nuk arriti të dëshmojë prejardhjen e mjeteve financiare dhe as të sqarojë lidhjen e tij me tre personat që i kishin transportuar paratë përmes Merdarës.
Pas intervistimit nga prokurori dhe hetuesit e rastit, ndaj Akifit u nxor vendim për ndalim prej 48 orësh.
Rasti po hetohet për veprat penale “Shpëlarja e parasë” dhe “Pjesëmarrja ose organizimi i grupit kriminal të organizuar”. Hetimet për prejardhjen e një milion eurove dhe rrethanat e transportimit të tyre janë ende në vazhdim.
