Sali Berisha deklaron se Belinda Balluku duhet të ishte prapa hekurave dhe jo të ecte e lirë. Në një komunikim me gazetarët, kre...
AKTUALITET
Rama "minon" hyrjen në BE? Firmosur nga Kryeministri-Komuniteti i Energjisë shpall Shqipërinë në shkelje të rëndë të ligjit evropian
PiranjatPërditësimi i fundit 22 Dhjetor 2025, 19:28
Komuniteti i Energjisë shpall zyrtarisht Shqipërinë në shkelje të detyrimeve ndaj BE-së në sektorin e energjisë elektrike. Nëpërmjet një dokument të siguruar nga “Piranjat” thuhet se Shqipëria nuk ka zbatuar ligjet, dispozitat administrative për të qenë në përputhje me Direktivën e Bashkimit Evropian.
Duke u mbështetur mbi këto konstatime, Komuniteti i Energjisë kërkon nga Shqipëria të marrë të gjitha masat e duhura për të korrigjuar shkeljen e identifikuar në Nenin 1 dhe të sigurojë përputhje me legjislacionin e Komunitetit të Energjisë pa vonesë.
“Shqipëria duhet të raportojë rregullisht pranë Sekretariatit dhe Grupit të Përhershëm të Nivelit të Lartë mbi masat e ndërmarra në vitin 2026”, thuhet në dokument i miratuar më 18 dhjetor në Vjenë.
Nëse shkelja nuk është korrigjuar deri më 1 korrik 2026, Sekretariati thotë se do të nisë procedurat kundër Shqipërisë sipas nenit 92 të Traktatit.
Më 31 tetor, Këshilli Kombëtar i Territorit dhe Ujit ka miratuar lejen e ndërtimit për TEC-in e Roskovecit. Leja është dhënë në mungesë të lejeve, që janë parakusht, leja e prodhimit të energjisë, leja e nga bazeni i Semanit, leja mjedisore.
DENONCIMI NGA PIRANJAT
Më 10 janar 2024 Agjencia Kombëtare e Planifikimit të Territorit i kërkoi mendim Ministrisë së Bujqësisë dhe Zhvillimit Rural për rishikimin e dokumentit të planit të përgjithshëm vendor të Bashkisë Roskovec.
Në referencë të ligjit për mbrojtjen e tokës bujqësore, ministria sugjeron të vlerësohen edhe mundësi të tjera të ndërtimit të termocentralit në toka me cilësi agroprodhuese të ulëta. Pra, TEC-i nuk lejohet të ndërtohet në një tokë bujqësore me potencial të lartë prodhimi, ndaj duhej zgjedhur një destinacion tjetër për ndërtimin e tij, por kjo nuk i pengoi aspak institucionet të vazhdonin përpara me procedurën e tyre te jashtëligjshme.
Më 21 mars 2024 Agjencia Kombëtare e Planifikimit të Territorit lëshoi akt përputhshmërinë. Në fakt shkresa u dha me një kusht për njësinë strukturore termocentral. Duke qenë se kërkesa për ndërtimin e TEC-it, nuk përputhej me legjislacionin e tokës, AKPT-ja ia la në dorë organeve politikbërëse, si Këshilli Bashkiak dhe Këshilli Kombëtar i Territorit që të merrnin vendimin. Në lidhje me këtë shkelje, drejtoresha e AKPT-së, Adelina Greca, nuk dha asnjë përgjigje për “Piranjat”.
Më 26 prill 2024 këshilli bashkiak Roskovec vendosi miratimin e dokumentit të rishikimit të planit të përgjithshëm vendor, duke qenë një hap më afër ndërtimit të TEC-it. Më pas më 29 maj 2024, Këshilli Kombëtar i Territorit, që kryesohet nga kryeministri Edi Rama, miratoi ndryshimet në planin e përgjithshëm vendor të Bashkisë së Roskovecit. Dokumenti mban firmën e kryeministrit Rama si dhe ministres së Infrastrukturës dhe Energjisë, Belinda Balluku. Pra, dy personat më të rëndësishëm të qeverisë, kanë shkelur me të dyja këmbët një ligj për t’i hapur rrugën një investimi, që me gjasa do të sjellë më shumë dëme se sa dobi për zonën e Roskovecit.
