Një incident është regjistruar në zonën pas stadiumit "Dinamo" në Tiranë, gjatë një aksioni të forcave "Shqi...
AKTUALITET
Rama po tenton të mbyllë RTSH-në/ Kuvendi projekt për një televizion të vetin me 500 mijë € investim në 2026
PiranjatPërditësimi i fundit 20 Janar 2026, 16:11
Në kulmin e debateve nëse televizioni publik duhet të mbyllet ose jo, Kuvendi i Shqipërisë prezanton projektin për një televizion të vetin, i cili do të prodhojë materiale edhe për RTSH-në. Me një investim prej 500 mijë eurosh, Byrosë së Kuvendit iu kërkua miratim për krijimin e një redaksie televizive për institucionin.
“Media Room-i është menduar të jetë një qendër e integruar multimediale brenda Kuvendit të Shqipërisë, e konceptuar si një “redaksi televizive” profesionale, që funksionon në mënyrë të përhershme dhe bashkëpunon ngushtë me RTSH-në për transmetimin në kanalin RTSH Kuvend”, - thuhet në relacion. Për këtë synohet të ngrihet një drejtori e re (Media-Room) pranë Shërbimit të Informacionit dhe Dokumentacionit, e cila të ketë rol të trefishtë, sipas dokumentit.
“Informues: të përcjellë në mënyrë transparente punën parlamentare për qytetarët. Analitik: të shpjegojë proceset legjislative, reformat dhe ndikimet e tyre. Dhe edukues: të ndihmojë qytetarët të kuptojnë funksionet dhe rolin e Kuvendit”.
Fillimisht parashikohet të nisë puna me strukturë të reduktuar redaksie me staf minimal, prodhim të përmbajtjeve bazike: Transmetime live, kronika, intervista, bashkëpunim i plotë me RTSH-në, për transmetimin dhe arkivim të materialeve.
“Qëllimi i programacionit televiziv të kanalit parlamentar është të ofrojë një pasqyrë të plotë, të strukturuar dhe të kuptueshme të veprimtarisë së Kuvendit për publikun e gjerë. Programet duhet të jenë të balancuara ndërmjet informimit të menjëhershëm, analizës së thelluar, edukimit qytetar dhe transparencës institucionale”,-thuhet në dokumentin që mban firmën e Sekretarit të Përgjithshëm të Kuvendit. 500 mijë eurot do të shpenzohen për studio televizive moderne, prodhim të plotë video/audio për TV Parlamentar, dhe platformë publike televizive të Kuvendit, e integruar me shërbimet AI.
Do të ofrohen komentim opsional, titrim dhe gjuhë të shenjave për seancat dhe komisionet.
