Seanca për "Plumbin e Artë", Nuredin Dumani: Gentian Sharrën e njoha nëpërmjet Talo Çelës! Vjedhja e parë me të ka qenë një makinë, më pas argjendari...

TIRANA- Në GJKKO vijon procesi për dosjen “Plumbi i Artë”, konkretisht për Nuredin Dumanin dhe personat e tjerë. Mësohet se i penduari i drejtësisë ka treguar detajet dhe rrethanat se si është njohur me Gentian Sharrën. Emri i këtij të fundit për herë të parë doli në dosjen e grabitjes së Rinasit, pasi ai ishte pronari i servisit ku ishte modifikuar furgoni me mbishkrimin “Hetimi Tatimor”, që u përdor për grabitjen.

Nuredin Dumani ka deklaruar se Sharrën e ka njohur përmes Talo Çelës dhe ai, sipas tij, blinte makina të vjedhura dhe madje tregon se së bashku kanë kryer vjedhje dhe grabitje në Elbasan. I penduari i drejtësisë shtoi se planin e grabitjes e kanë realizuar në shtëpinë e Talo Çelës. Sipas Dumanit, plani ishte organizuar nga Sharra, i cili kishte propozuar përdorimin e një leve hekuri për goditjen e viktimës.

“Gentian Sharrën e njoh në 2010. E njoh nëpërmjet Talo Çelës, kishte një lokal ne Bradashesh dhe një servis. Sharra blinte makina te vjedhura, kam shkuar dhe vetë ose me njerëz të tjerë duke çuar aty makina te vjedhura. Përveç kësaj kemi bërë edhe grabitje bashkë. Vjedhja e parë që kam bërë me Gent Sharrën ka qenë një makinë. Ndërsa mbaj mend që kemi grabitur një argjendar në Elbasan. Me duket ne fund te vitit 2011 ose fillim i 2012.

Gentian Sharra e planifikoi grabitjen ai ishte organizatori. Unë kam shkuar vetëm ditën e ngjarjes.Folëm tek shtëpia e Talo Çelës për planin e grabitjes. Unë kam ardhur tek shtëpia e Talos me  Ilirjan Fecin. Shtëpia e Talos është në afërsi të lokalit të Gent Sharrës. Gjatë grabitjes unë mora  dy çanta, ndërsa një e mori Ilirjani. Brenda çantat kishin bizhuteri, rreth 30 ora, ndërsa flori në total kishte rreth 8 kilogramë e 300 gramë. Çantat i çuam në papafingon e shtëpisë së Talo Çelës. I lamë bizhuteritë dhe floririn mbi një tavolinë", ka deklaruar Nuredin Dumani.

Prokuroria e Posaçme po vijon procesin për dosjen e bujshme, ku ka disa të pandehur. Dumani është në cilësinë e të penduarit, si bashkëpunëtor i SPAK, duke zbardhur të paktën 12 vrasje dhe dhjetëra krime të tjera në një dekadë, si dhe porositë që merrte për ekzekutime, me pagesa deri në 200 mijë euro.

nuredin dumani