Një tjetër tentativë e negociatorëve për të bindur 35-vjeçarin të dorëzohet është zhvilluar pak minut...
AKTUALITET
Shqiptarët po marrin vetë hak, rastet e “vetëgjyqësisë” u rritën me 34% në vitin 2025
PiranjatPërditësimi i fundit 21 Maj 2026, 10:27
Raporti vjetor i Prokurorit të Përgjithshëm 2025 tregon se pjesa më e madhe e procedimeve për veprat penale kundër rendit dhe sigurisë publike lidhen me sigurinë rrugore dhe drejtimin e automjeteve, duke nxjerrë në pah një tendencë shqetësuese të drejtimit të parregullt të mjeteve dhe largimit nga vendi i aksidentit.
Megjithatë, ai nxjerr në pah një fenomen në rritje që është “Vetëgjyqësia”. Në mungesë edhe të gjetjes së drejtësisë te organet e rendit apo te sistemi i drejtësisë, qytetarët po “i zgjidhim vetë” problemet apo konfliktet e tyre. Procedimet për këtë vepër penale janë rritur me 34,35 % gjatë vitit 2025, ndërsa pesha e saj në grupin e veprave kundër rendit dhe sigurisë publike ka arritur në 4,51 %, nga 4 % një vit më parë.
Ndërkohë, vepra penale “Drejtimi i automjeteve në mënyrë të parregullt”, e parashikuar nga neni 291 i Kodit Penal, zë peshën më të madhe në të gjithë këtë grup, me 53,18 % të procedimeve në vitin 2025, nga 51,22 % një vit më parë. Për këtë vepër penale, procedimet e regjistruara janë rritur me 23,86 % krahasuar me vitin 2024.
Një tjetër kategori me peshë të lartë mbetet “Shkelja e rregullave të qarkullimit rrugor”, e cila zë 17,50 % të procedimeve për këtë grup veprash penale, megjithëse pesha e saj ka rënë nga 19,46 % në vitin 2024. Megjithatë, edhe për këtë vepër penale raporti evidenton rritje të procedimeve me 7,07 % gjatë vitit 2025.
Në rritje rezultojnë edhe procedimet për “Largimin nga vendi i aksidentit”, të cilat u shtuan me 12,54 % krahasuar me një vit më parë. Kjo vepër penale zë 5,76 % të grupit të procedimeve kundër rendit dhe sigurisë publike. Ndërkohë, procedimet për “Prodhimin dhe mbajtjen pa leje të armëve luftarake dhe municionit” janë rritur me 14,77 %, ndërsa kjo kategori përbën 4,99 % të procedimeve të grupit. Rritje edhe më e fortë evidentohet për “Prodhimin dhe mbajtjen pa leje të armëve të ftohta”, me 31,82 % më shumë procedime se në vitin 2024 dhe një peshë prej 4,23 % të totalit.
Nga analiza sociale e të pandehurve rezulton se 93,45 % janë të rritur dhe 6,55 % të mitur. Pjesa dërrmuese e të pandehurve janë meshkuj, të cilët përbëjnë 91,32 % të totalit. Raporti evidenton gjithashtu praninë e 84 të pandehurve me shtetësi të huaj.
Në aspektin arsimor, 58,48 % e të pandehurve rezultojnë me arsim të mesëm, 30,64 % me arsim deri 9-vjeçar dhe vetëm 10,88 % me arsim të lartë. Sipas raportit, 60,09 % e të pandehurve janë të punësuar në sektorin privat, 38,74 % janë të papunë dhe vetëm 1,10 % janë të punësuar në sektorin shtetëror, ndërsa pjesa tjetër rezultojnë punonjës të Policisë së Shtetit.
Të dhënat tregojnë gjithashtu se këto vepra penale janë më të përhapura në zonat urbane. Sipas raportit, 71,12 % e të pandehurve kanë vendbanim në qytet dhe 28,88 % në fshat. Nga ana tjetër, 89,93 % e të pandehurve rezultojnë të padënuar më parë, ndërsa 9,47 % janë përsëritës për vepra të tjera penale dhe 0,60 % përsëritës për të njëjtën vepër.
Nga shpërndarja gjeografike rezulton se Tirana mban peshën kryesore të procedimeve për këto grupvepra, me 33 % të totalit kombëtar. Pas saj renditen Durrësi dhe Fieri, me nga 9 % secili, ndërsa Kukësi ka nivelin më të ulët, me vetëm 2 % të procedimeve në shkallë vendi.
Raporti jep edhe të dhëna për viktimat. Në vitin 2025, 85,69 % e viktimave të këtyre veprave penale kanë qenë të rritur dhe 14,31 % të mitur. Nga viktimat madhore, 76,11 % janë meshkuj dhe 23,89 % femra.
