Kreu i degës së Partisë Demokratike në Krujë, Aulon Kalaja, ka denoncuar publikisht presione të dyshuara të policisë n...
AKTUALITET
Kompania “Erzeni” tallet me iso-polifoninë/ Reagon artisti i njohur: Po fyhet kënga e Labërisë
PiranjatPërditësimi i fundit 28 Maj 2026, 20:21
Fushata e fundit reklamuese e kompanisë së bulmetit “Erzeni” ka shkaktuar reagime të shumta në rrjetet sociale dhe në qarqet kulturore, pasi në një video promovuese është përdorur imazhi i një grupi iso-polifonik, ndërsa portretet e këngëtarëve janë zëvendësuar me figura lopësh.
Kjo mënyrë trajtimi është konsideruar nga shumë reagues si denigruese ndaj iso-polifonisë shqiptare, kostumeve tradicionale dhe trashëgimisë kulturore të Labërisë. Kritikat janë përqendruar te fakti se reklama prek një nga elementët më të rëndësishëm të identitetit kulturor shqiptar, i njohur ndërkombëtarisht dhe i mbrojtur nga UNESCO si pjesë e trashëgimisë jomateriale botërore që prej vitit 2005.
Për këtë çështje ka reaguar edhe Mjeshtri i Madh Sejmen Gjokoli, organizator i “Aulona Inter Folk Festival”, i cili e cilësoi reklamën si një deformim të papranueshëm të këngës polifonike dhe figurës së këngëtarëve labë.
Ai shton se përdorimi i tillë i figurës së grupit polifonik përbën jo vetëm mungesë respekti ndaj trashëgimisë kulturore, por edhe cenim të dinjitetit të artistëve të përfshirë në video.
Reagimi i plotë
JO, ERZENI, KJO NUK ËSHTË REKLAMË...
Po qarkullon një reklamë e Kompanisë së prodhimit të bulmetrave Erzeni ku si imazh përdoret një grup i njohur polifonik. Do të ishte normale ky përdorim (kuptohet si një klip i bukur në marrëveshje me anëtarët e grupit) por kurrsesi në një deformacion e trajtesë e tillë. Është e shenjtë kënga e Labërisë, zotërinj, janë të shënjta kostumet e ardhura nga brezat e shkuar, janë po të shenjta fytyrat e këngëtarëve që e ruajn dhe e përcjellin këtë pasuri të madhe shpirtërore të njerëzve të Labërisë. Hiqeni urgjent reklamën e cila mund të jetë e tillë për ju por jo për shenjtërinë e këngës tonë shpirtërore, këtë ind të qashtër kombëtar. Ndërkohë duhet të përgjigjeni kundrejt penaliteteve që përcakton ligji anëtarëve të grupit që ju, me reklamën tuaj, i keni përçudnuar publikisht.
Debati i hapur pas publikimit të reklamës ka rikthyer në vëmendje kufijtë etikë të marketingut dhe mënyrën sesi kompanitë private duhet të trajtojnë elementët e trashëgimisë kombëtare në fushatat promovuese./Piranjat News
