Sot vendi ynë do të jetë nën ndikimin e masave ajrore relativisht të qëndrueshme dhe të nxehta.
Moti parashikohet kryesish...
AKTUALITET
Tenderët, 62% e ankesave në vitin 2024 ishin për vlerësimin e ofertave
n.fPërditësimi i fundit 7 Prill 2025, 14:25
TIRANË- Të paktën 62 për qind e ankimimeve të paraqitura në Komisionin e Prokurimit Publik gjatë vitit të shkuar kishte të bënte me fazën e vlerësimit të ofertave. Të dhënat zyrtare nga ky Komision tregojnë se numri total i ankesave të paraqitura pranë tij ishte 1151.
“Rreth 437 prej tyre ose rreth 38 %, janë ankesa të paraqitura për dokumentet e tenderit dhe 714 ankesa ose rreth 62 % e tyre, janë ankesa të paraqitura për fazën e vlerësimit të ofertave” thuhet në raport. I njëjti nënvizon se në vitin 2024, Komisioni i Prokurimit Publik shqyrtoi 1135 ankesa, nga të cilat për 327 ankesa i ka kërkuar autoritetit kontraktor të bëjë modifikimet e specifikuara në vendim.
“Gjatë vitit 2024, pas tejkalimit të afatit ligjor, KPP iu ka dërguar 99 kërkesa drejtuar autoriteteve kontraktore për zbatim – vendimi, në krahasim me 78 kërkesat në vitin 2023. Shpejtësia mesatare e zbatimit të vendimit nga autoriteti kontraktor është 6.1 ditë nga data e dërgimit të kërkesës për zbatim vendimi” thuhet në raport.
Por pavarësisht akimimeve që mund të bëjnë operatorët ekonomikë për një procedurë jo në të gjithë rastet ajo mund të pranohet nga ana e Komisionit. Referuar shifrave numri më i lartë i ankesave ka të bëjë me kategorinë e mallrave, ku u regjistruan 728 ose 63.2 % ankesa, vijon me kategorinë shërbime me një numër prej 310 ose 27 % ankesash, punë publike 112 ose 9.7% ankesa dhe leje minerare 1 ose 0.1 % ankesa.
“Në këto kategori, Komisioni ka pranuar plotësisht 49.9 % të ankesave, ka refuzuar 32 % të ankesave, ka mbyllur çështjen ose pranuar nga ana e autoritetit kontraktor në 14.7 % të rasteve, ndërsa ka pasur tërheqje nga ankesat në 3.1 % të rasteve dhe nuk ka marrë në shqyrtim 0.3 % të ankesave. Ky informacion mund të shërbejë si bazë për të identifikuar fushat problematike dhe për të ndërmarrë masa përmirësuese në proceset e prokurimit publik në të ardhmen” vlerëson KPP.
Gjatë periudhës 1 janar 2024 – 31 dhjetor 2024, janë regjistruar pranë Komisionit të Prokurimit Publik, 1151 ankesa në total, prej të cilave 1144 (99.4 %) ankesa janë paraqitur për procedurat e prokurimit publik, 5 (0.4 %) ankesa për procedurat e ankandit publik, 1 (0.1 %) ankesë në fushën e mbrojtjes dhe sigurisë dhe 1 (0.1 %) ankesa për leje minerare./ Monitor
