Një aksident i rëndë është regjistruar pasditen e sotme në Shkodër, ku një 67-vjeçare ka humbur jetën pasi &...
POLITIKE
Berisha: Asnjë taksë mbi 12.5%, nafta nuk do të kushtojë më shumë se në vendet fqinje
PiranjatPërditësimi i fundit 1 November 2026, 15:10
Sali Berisha premton se me Partinë Demokratike në pushtet asnjë taksë nuk do të jetë mbi 12.5 për qind, ndërsa nafta nuk do të kushtojë më shumë se në vendet fqinje. Gjatë komunikimit me ndjekësit, kreu i opozitës kërkoi qeveri kujdestare, mbështeti listat e hapura dhe garantoi vazhdimin e mbështetjes së demokratëve për protestën studentore.
Asnjë taksë mbi 12.5 për qind, përfshirë TVSH-në, dhe çmim të naftës jo më të lartë se në vendet fqinje. Këto janë premtimet e Sali Berishës në rast se Partia Demokratike vjen në pushtet.
“Unë garantoj çdo qytetar shqiptar, së pari në republikën e Shqipërisë për PD në pushtet nuk do ketë asnjë taksë mbi 12.5 përqind, përfshi TVSH-në.”
Kreu i opozitës kritikoi projektbuxhetin dhe paketën fiskale të vitit 2027, duke pretenduar se ndryshimet do të rëndojnë mbi qytetarët, bizneset e vogla dhe shtresën e mesme.
Sipas tij, përfshirja e më shumë bizneseve në skemën e TVSH-së do të rrisë çmimet, ndërsa ndryshimi i taksës së dividendit nga 8 në 15 për qind do të dëmtojë investimet e huaja.
Berisha premtoi gjithashtu lehtësim fiskal për profesionet e lira dhe heqjen e taksës së qarkullimit nga automjetet.
“Ndaj dhe garantoj qytetarët se në pompë në Shqipëri nuk do shitet kurrë një litër naftë më shtrenjtë se në vendet përreth. Kurse taksa e qarkullimit nuk do paguhet në makinë.”
Sa i përket zhvillimeve politike, kreu demokrat përsëriti kërkesën për dorëheqjen e kryeministrit Edi Rama dhe krijimin e një qeverie kujdestare, e cila, sipas tij, duhet të realizojë reformën zgjedhore dhe të përgatisë zgjedhje të lira.
“Rama dorëheqjen, një qeveri kujdestare e cila do të bëjë reformën zgjedhore, e cila do t'i hapë rrugën drejtësisë për të gjitha vendimet e saj kundër korrupsionit dhe përgatitjen e një fushe të barabartë për zgjedhje të lira dhe të ndershme.”
Berisha u shpreh në favor të listave plotësisht të hapura dhe modelit zgjedhor të Kosovës, por këmbënguli se ndryshimi i sistemit nuk mjafton pa garantuar kushte të barabarta gare.
“Jam i gatshëm për listat plotësisht të hapura. Jam i gatshëm për sistemin që ka Kosova.”
Në fund, kreu i PD-së komentoi edhe incidentet dhe përplasjet brenda protestave, duke akuzuar një grup të vogël aktivistësh se po përpiqen të pengojnë pjesëmarrjen e demokratëve. Ai theksoi se PD-ja nuk pretendon drejtimin e protestës studentore, por do të vijojë mbështetjen për të.
“Garantoj se kjo mbështetje do të vazhdojë me çdo çmim dhe pa asnjë lloj hezitimi.”
