Pamjet e të miturve të përplasur me policinë, protestuesve të goditur me shkopinj gome dhe Erjon Vishkullit, i cili u plagos në sy...
INVESTIGIME
150 ditë në shesh e përballë goditjeve: Historia e protestuesit që sfidon pushtetin!
PiranjatPërditësimi i fundit 31 October 2026, 15:51
Një nga episodet më të shëmtuara të protestave qytetare të javës së kaluar ishte padyshim goditja pa mëshirë e një 47-vjeçari nga efektivët e forcave Shqiponja. Pamje që u filmuan nga gazetari Osman Stafa dhe që bënë me shpejtësi xhiron e rrjetit.
Po kush ishte personi që u qëllua me shkop gome dhe shkelma në trup dhe në kokë, derisa u la pa ndjenja në një kënd të errët pranë stadiumit Dinamo?
Lulëzim Gjini, pjesëmarrës në protestë, tregon se atë natë ka qenë bashkë me 3 vajza të tjera, të cilat përpiqeshin t’i shmangeshin policisë. Papritmas, 3 prej efektivëve të Shqiponjave i kanë goditur me spraj në sy, duke bërë kështu që të humbnin ndjenjat. Do të ishte ky momenti kur situata do të përshkallëzohej dhe disa dhjetëra uniforma të policisë do të sulmonin grupin e vogël të protestuesve.
Për çudi, kësaj radhe, pas dhunës, efektivët do të largoheshin pa kryer procedurën e zakonshme të shoqërimit të personave të kapur. Kjo gjë vërtetohet edhe nga disa foto të bëra pak minuta pas sulmit brutal, ndërsa 47-vjeçari ishte dërguar në QSUT.
A mund të ketë shkak më të madh sesa rreziku i një traume fizike për të hequr dorë nga dalja në sheshe dhe përballja me forcat e policisë?
Lulëzimi thotë se ka dalë dhe do të dalë çdo ditë në protestë. Po çfarë e shtyn një qytetar të dalë e të protestojë për mbi 150 ditë pa ndërprerje?
Ai thotë: “Jam 47 vjeç sot dhe nuk kam një shtëpi timen”.
Por, për t’iu kthyer momentit të dhunës policore, sipas komunikatës së policisë, personi i identifikuar si dhunues i Lulëzim Gjinit, efektivi i Shqiponjave me inicialet A. K., është pezulluar nga detyra, ndërkohë që vetë i dëmtuari ka bërë kallëzim në lidhje me rastin./Piranjat news
Të gjitha të drejtat e këtij materiali janë pronë ekskluzive dhe e patjetërsueshme e Piranjat.al sipas ligjit Nr. 35/2016 “Për të drejtën e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi pa autorizimin e Piranjat.al në të kundërt çdo shkelës do të mbajë përgjegjësi.
