Në mbështetje të studentëve që protestojnë para Ministrisë së Arsimit, protestës i është bashkuar edhe ...
BOTA
Alarm në Izrael, ministrave u kërkohet të fiknin GPS-in nga frika e Iranit
PiranjatPërditësimi i fundit 4 Mars 2026, 20:13
Autoritetet izraelite kanë paralajmëruar ministrat e qeverisë dhe bashkëpunëtorët e tyre të çaktivizojnë shërbimet e vendndodhjes në telefonat celularë për shkak të një rritjeje të kërcënimeve kibernetike nga Irani.
Sipas një zyrtari izraelit dhe një burimi të njohur me çështjen, ministrave iu dërgua një mesazh paralajmërues ku u kërkohej të siguroheshin që asnjë aplikacion apo shërbim të mos përdorte GPS-in për të identifikuar vendndodhjen e tyre. Paralajmërimi përfshinte aplikacione si fotot, Facebook dhe Google Maps.
Në mesazh thuhej se organizatat e inteligjencës iraniane po bashkëpunojnë për të lokalizuar drejtues të lartë izraelitë, duke përdorur mjete kibernetike dhe teknologjike për të gjurmuar lëvizjet e tyre.
Në vitin e fundit, Izraeli ka arrestuar disa qytetarë të vet të akuzuar për spiunazh në favor të Iranit. Muajin e kaluar, një shtetas izraelit u arrestua pasi dyshohet se kishte mbledhur informacione për ish-ministrin e Mbrojtjes Yoav Gallant, sipas agjencisë së sigurisë së brendshme Shin Bet.
Në shkurt, Shin Bet dhe Drejtoria Kombëtare e Sigurisë Kibernetike deklaruan se kishin penguar qindra përpjekje të inteligjencës iraniane për të hakuar telefonat e zyrtarëve izraelitë. Sipas tyre, që nga fillimi i përshkallëzimit të konfliktit mes Iranit dhe Izraelit është vërejtur një rritje e ndjeshme e përpjekjeve për të depërtuar në llogari private Google, aplikacione komunikimi dhe sisteme të tjera digjitale.
Paralelisht, edhe Ministria izraelite e Shëndetësisë njoftoi se ka udhëzuar të gjitha institucionet shëndetësore të rrisin nivelin e gatishmërisë për sulme kibernetike. Organizatat shëndetësore janë urdhëruar të kalojnë në nivelin e dytë më të lartë të mbrojtjes kibernetike.
Masat vijnë në një moment kur përplasja mes Iranit dhe Izraelit po zhvillohet jo vetëm në fushën ushtarake, por edhe në frontin kibernetik dhe të inteligjencës.
