I ftuar në emisionin ‘Kafe Shqeto’ në Syri TV, pedagogu Gjok Vuksani ka akuzuar kryeministrin Edi Rama për gjuhën fyese ndaj s...
BOTA
BE gjobit Google me 2,95 miliardë dollarë, reagon ashpër Presidenti Donald Trump dhe paralajmëron masa
PiranjatPërditësimi i fundit 5 Shtator 2025, 22:27
Presidenti i SHBA, Donald Trump, ka reaguar ashpër ndaj vendimit të Komisionit Europian për të gjobitur kompaninë teknologjike Google, duke paralajmëruar se nëse BE nuk tërhiqet, ai do të përgjigjet me masa tregtare ndëshkuese ndaj Bashkimit Evropian. Në një postim në platformën e tij Truth Social, Trump shkruan: “Evropa sulmoi sot një tjetër kompani të madhe amerikane, Google. Kjo nuk do të mbetet pa përgjigje.”
Ai paralajmëroi se nëse Brukseli nuk heq dorë nga gjobat “të padrejta”, si ndaj Google, ashtu edhe ndaj Apple, atëherë ai do të jetë “i detyruar” të aktivizojë nenin 301, një mekanizëm ligjor amerikan që lejon vendosjen e tarifave ndëshkuese ndaj vendeve që dëmtojnë interesat tregtare të SHBA.
“Nuk mund të lejojmë që shpikësi amerikane, unike dhe e paparë, të ndëshkohet në këtë mënyrë. Nëse ndodh, do të filloj zbatimin e nenit 301 për të anuluar këto ndëshkime të padrejta ndaj kompanive tona që paguajnë taksa,” shtoi Trump.
BE gjobit Google me 2,95 miliardë dollarë
Pak orë më parë, Komisioni Europian njoftoi një gjobë prej 2,95 miliardë dollarësh ndaj Google, duke e akuzuar për abuzim me pozitën dominuese në tregun e reklamave digjitale. Kjo është gjoba e katërt me radhë që Bashkimi Evropian i vendos gjigantit teknologjik amerikan gjatë viteve të fundit, në kuadër të hetimeve për shkelje të rregullave të konkurrencës. Zyrtarët evropianë theksuan se Google duhet të ndalojë praktikat e vetë-favorizimit dhe të shmangë konfliktet e interesit brenda zinxhirit të teknologjisë së reklamave. Pavarësisht kundërshtimeve nga Google dhe kërcënimeve të Trump, BE ka sinjalizuar se do të vazhdojë monitorimin dhe ndëshkimin e sjelljeve antikonkurruese, si pjesë e përpjekjeve për të rregulluar tregun dixhital evropian. /Piranjat/
