Deputetja e Partisë Demokratike dhe kryetarja e Komisionit për të Drejtat e Njeriut dhe Mjetet e Informimit Publik, Jorida Tabaku, zhvilloi n&e...
BOTA
Delcy Rodriguez betohet si presidente e përkohshme e Venezuelës
PiranjatPërditësimi i fundit 6 Janar 2026, 07:57
Delcy Rodríguez u betua si presidente e përkohshme e Venezuelës gjatë një seance parlamentare të jashtëzakonshme, e cila nisi me kërkesa të forta për lirimin nga paraburgimi në SHBA të udhëheqësit Nicolas Maduro, raporton BBC.
Rodríguez, 56 vjeçe, që mban postin e zëvendëspresidentes që nga viti 2018, e cilësoi arrestimin e Maduros dhe të bashkëshortes së tij, Cilia Flores, si një “rrëmbim”. Sipas saj, të dy u kapën nga forcat amerikane gjatë një operacioni të zhvilluar gjatë natës të shtunën.
Ndërkohë, vetëm dy orë më herët, në një sallë gjyqi në Nju Jork, Maduro këmbënguli se mbetet president i Venezuelës, duke u deklaruar i pafajshëm për katër akuza që lidhen me trafik droge dhe terrorizëm.
Ngjarja ka shkaktuar reagime të forta në arenën ndërkombëtare. Në Kombet e Bashkuara, Shtetet e Bashkuara u përballën me kritika të ashpra për veprimet e tyre.
Megjithatë, ambasadori amerikan u përgjigj se rezervat më të mëdha energjetike në botë nuk mund të mbeten, sipas tij, në duart e një udhëheqësi jolegjitim dhe “të arratisur nga drejtësia”.
Përpara paraqitjes në gjykatë, Këshilli i Sigurimit i OKB-së mbajti një seancë urgjente për të diskutuar situatën në Venezuelë.
Ambasadori i Venezuelës, Samuel Moncada, tha se vendi i tij kishte qenë objekt i një “sulmi të armatosur të paligjshëm pa asnjë justifikim ligjor”.
Ambasadori i SHBA-së në OKB, Mike Waltz, e justifikoi sulmin duke e përshkruar Maduron si “një president të paligjshëm”. Waltz shtoi se SHBA-të kishin kryer një “operacion kirurgjikal të zbatimit të ligjit” për të kapur Maduron, të cilin ai e quajti gjithashtu një “të arratisur nga drejtësia”.
Maduro është akuzuar për narkoterrorizëm, për importimin e kokainës, posedim të armëve dhe pajisjeve shkatërruese.
