Shqipëria ka arritur rekord për punësimin e shtetasve të huaj që arrijnë mbi 22 mijë shtetas deri në qershor 2026 nga 18...
BOTA
FOTO/ Kjo është Zonja e parë e re e Sirisë, dalja e saj jashtë vendit përkrah gruas së Erdoganit
E.DPërditësimi i fundit 5 Shkurt 2025, 11:09
TURQI- Zonja e re e parë e Sirisë, Latifa al-Daroubi, bëri paraqitjen e saj të parë jashtë vendit, duke vizituar Turqinë me bashkëshortin e saj, Ahmed al-Sara, në kuadër të vizitës së tij në Ankara. Zonja al-Daroubi madje u takua me gruan e Rexhep Tayyip Erdogan, Emine, me të cilën u fotografua. Siç raportojnë mediat turke, në takimin mes dy grave në Ankara, Latifa al-Daroubi dhe Emine Erdogan shkëmbyen mendime për ndihmën humanitare, fuqizimin e grave dhe rolin e arsimit.
Dy Zonjat e Parë diskutuan gjithashtu hapat që Turqia dhe Siria mund të ndërmarrin së bashku për të mbështetur gratë dhe fëmijët që vuajnë nga luftërat në mbarë botën. Al-Daroubi thuhet se shprehu mirënjohjen e saj për Turqinë për mbështetjen e Ankarasë në rindërtimin e Sirisë.
“Kam pasur kënaqësinë të mirëpres zonjën Latifa al-Daroubi, bashkëshorten e presidentit sirian, e cila bëri një vizitë zyrtare në vendin tonë. Patëm rastin të diskutonim për disa çështje të rëndësishme si ndihma humanitare, solidariteti social, forcimi i pozitës së gruas dhe roli i arsimit. I thashë se ne qëndrojmë pranë popullit sirian, siç kemi bërë në të kaluarën, në procesin e rindërtimit të Sirisë dhe shërimit të plagëve të saj. Besoj se e ardhmja e paqes dhe stabilitetit do të jetë rezultat i përpjekjeve të përbashkëta dhe shpresoj që çdo hap që bëjmë në këtë drejtim të jetë një shpresë për banorët e rajonit”, shkroi Emine Erdogan në X.
Latifa al-Daroubi ka lindur në vitin 1984. Ajo ka një diplomë master në gjuhë dhe letërsi arabe dhe është nënë e tre fëmijëve. Familja e saj është me origjinë nga Homs dhe motra e saj është e martuar me guvernatorin aktual të Damaskut, Maher Mohammed Marwan. Një nga paraqitjet e saj të rralla publike ishte në një takim me gra nga Siria dhe Shtetet e Bashkuara. Njerëzit që morën pjesë në takim e përshkruan atë si“një grua të kulturuar, të sofistikuar dhe elegante.
