Kryetari i Partisë Demokratike Sali Berisha, ka sjellë në vëmendje një deklaratë të eurodeputetit Tomáš Zdech...
BOTA
Netanyahu premton hakmarrje ndaj Houthive për raketën në Izrael: Do të ketë sulme
E.DPërditësimi i fundit 4 Maj 2025, 19:19
IZRAEL- Kryeministri izraelit Benjamin Netanyahu ka premtuar kundërmasa ndaj rebelëve Houthi të Jemenit, pas lëshimit të një rakete që goditi zonën pranë aeroportit Ben Gurion, afër Tel Avivit.
“Ne kemi vepruar kundër tyre edhe më parë dhe do të veprojmë përsëri, por nuk mund të jap detaje… kjo nuk do të mbyllet me ‘një bum të vetëm’, por do të ketë ‘shumë bum-e'”, tha Netanyahu në një video në kanalin e tij në Telegram.
Raketa e lëshuar nga Houthit, që morën përsipër përgjegjësinë, ra pranë aeroportit kryesor ndërkombëtar të Izraelit, Ben Gurion, duke shkaktuar një shtyllë tymi dhe panik mes udhëtarëve. Rebelët Houthi, të lidhur me Iranin, kanë shtuar sulmet me raketa ndaj Izraelit si shenjë solidariteti me palestinezët në Gaza.
Një zyrtar i lartë i policisë izraelite, Yair Hezroni, tregoi për gazetarët një krater të madh të shkaktuar nga shpërthimi, pranë një rruge pranë terminalit 3 të aeroportit. Sipas tij, nuk ka dëme të mëdha materiale. Ministri izraelit i Mbrojtjes, Yoav Gallant, deklaroi: “Kushdo që na godet, do të goditet shtatëfish”.
Sirenat u dëgjuan në gjithë Izraelin qendror pak para goditjes, përfshirë zonën pranë Tel Avivit. Gazetarët dhe udhëtarët panë njerëz që vraponin drejt dhomave të sigurisë, ndërsa video të shumta treguan shtylla tymi të zi pranë avionëve dhe godinave të aeroportit.
Shërbimi izraelit i ambulancave raportoi tetë të plagosur, përfshirë një burrë me plagë në gjymtyrë dhe dy gra me lëndime të lehta në kokë. Aeroporti rifilloi operimin normal pas një ndërprerjeje të përkohshme, megjithatë disa fluturime u anuluan ose u vonuan, përfshirë ato të Air India, TUS Airways dhe Lufthansa. Disa fluturime drejt SHBA u vonuan rreth 90 minuta. Zëdhënësi ushtarak i Houthive, Yahya Sarea, deklaroi se aeroporti izraelit nuk është më i sigurt për udhëtime ajrore, duke paralajmëruar linjat ajrore ndërkombëtare.
