Kryetari i Partisë Demokratike Sali Berisha, ka sjellë në vëmendje një deklaratë të eurodeputetit Tomáš Zdech...
BOTA
PZAP hedh poshtë ankesën e LVV-së kundër certifikimit të Listës Serbe
n.fPërditësimi i fundit 9 Janar 2025, 18:02
Foto
KOSOVË- Paneli Zgjedhor për Ankesa dhe Parashtresa (PZAP) e hodhi poshtë si të palejuar ankesën e partisë në pushtet, Lëvizja Vetëvendosje (LVV), kundër certifikimit të partisë më të madhe të serbëve në Kosovë, Lista Serbe, për pjesëmarrje në zgjedhjet parlamentare të 9 shkurtit. Partia në pushtet i kërkoi javën e kaluar PZAP-it që ta shfuqizojë vendimin e Komisionit Qendror Zgjedhor (KQZ) për certifikimin e Listës Serbe.
“Hidhet poshtë e palejuar... ankesa e paraqitur nga Lëvizja Vetëvendosje... kundër Komisionit Qendror të Zgjedhjeve, ku kërkohej anulimi i Vendimit të KQZ-së i datës 31.12.2024, dhe urdhërohej KQZ-ja të nxirrte vendim tjetër”, thuhet në njoftimin e PZAP-it të enjten.
Në fund të muajit të kaluar, PZAP-i e urdhëroi KQZ-në ta certifikojë Listën Serbe, pasi e pranoi ankesën e partisë serbe ndaj vendimit të fillestar të komisionit për moscertifikimin e saj, duke thënë se kjo parti kishte dorëzuar dokumentacionin në përputhje me Ligjin për zgjedhjet e përgjithshme dhe me rregullat e tjera të KQZ-së.
LVV-ja e humbi betejën ndaj këtij vendimi edhe në Gjykatën Supreme, e cila më 31 dhjetor e cilësoi ankesën e saj si të palejuar. PZAP-i tha se duke qenë se Gjykata Supreme e ka vërtetuar vendimin e saj më 31 dhjetor, vendimi i saj "duhet të zbatohet dhe për këtë nuk ka nevojë për votim".
Një ditë më parë, KQZ-ja e miratoi përmbajtjen e fletëvotimit për Zgjedhjet, me Listën Serbe pjesë të saj. Përfaqësuesit e partisë në pushtet e kanë arsyetuar kundërshtimin e certifikimit të Listës Serbe duke thënë se kjo parti nuk e njeh shtetin e Kosovës dhe vazhdon ta quajë atë provincë autonome të Serbisë, "Kosova dhe Metohia".
Ndër arsyet e kundërshtimit të pjesëmarrjes së Listës Serbe në zgjedhje nga Vetëvendosja është edhe fakti se partia serbe nuk është distancuar nga ish-nënkryetari i saj Millan Radoiçiq, i cili ka marrë përgjegjësinë për sulmin e armatosur në Banjskë, ku u vra një polic kosovar.
Ndërkohë, kryetari i Listës Serbe, Zllatan Ellek, deklaroi se kryeministri i Kosovës, Albin Kurti, po përpiqet të pengojë pjesëmarrjen e kësaj partie në zgjedhje, pasi e konsideron atë "kundërshtarin më të madh".
Komuniteti ndërkombëtar ka shprehur shqetësimin se procesi i verifikimit të subjekteve politike është “i motivuar politikisht”, duke theksuar se “është e domosdoshme që votuesit, dhe jo trupat politike, të vendosin se kush i përfaqëson ata”.
Para certifikimit të Listës Serbe, më 31 dhjetor nga KQZ-ja, Bashkimi Evropian ka deklaruar se është e nevojshme të sigurohet pjesëmarrja e lirë e të gjithë kandidatëve dhe partive politike të kualifikuara. Lista Serbe u themelua në vitin 2013 me mbështetjen e Beogradit zyrtar dhe që atëherë ka pasur mbështetje për të marrë pjesë në institucionet e Kosovës.
Deri më tani, në të gjitha proceset zgjedhore ku ka marrë pjesë, kjo parti ka fituar mbi 90 për qind të votave të komunitetit serb, por Misioni Vëzhgues i BE-së, në raportin e saj të vitit 2021, ka përfunduar se Lista Serbe ka “monopolizuar jetën politike ndërmjet serbëve të Kosovës” dhe janë shënuar raste të frikësimit dhe presionit ndaj votuesve nga kandidatët dhe aktivistët e kësaj partie./ REL
