Kryeministri Edi Rama ka bërë disa dalje publike, ku ka ftuar studentët të dialogojnë, pasi protestat kanë vijuar prej ditësh...
BOTA
Senatori nigerian dënohet me 9.5 vjet burg, tentoi t'i merrte veshkën një të riu për vajzën e tij
PiranjatPërditësimi i fundit 5 Maj 2023, 18:39
Senatori 60-vjeçar nigerian Ike Ekweremadu u dënua me nëntë vjet e tetë muaj burg të premten nga një gjykatë në Londër për tentativën për të transplantuar veshkën e një të riu në vajzën e tij, pa dijeninë e këtij të fundit.
Senatori, gruaja e tij Beatrice dhe një mjek që vepronte si ndërmjetës u shpallën fajtorë në mars për organizimin e transferimit të viktimës në Londër. Beatrice Ekweremadu u dënua me katër vjet e gjashtë muaj burg dhe mjekja Obina Obeta me 10 vjet burg.
21-vjeçari nga Lagos ishte një shitës ambulant dhe i ishte premtuar një punë në Britani.
Të tre të pandehurit përballeshin me dënim të përjetshëm . Ata u shpallën fajtorë sipas ligjit modern të punës britanike, hera e parë që ligji zbatohej në një rast transplantimi të paligjshëm.
"Ju të gjithë keni luajtur një rol në këtë tregti të dënueshme," tha gjykatësi Jeremy Johnson në shpalljen e vendimit të tij, të cilin të pandehurit e dëgjuan të tronditur. “Tregtia e organeve njerëzore është një formë skllavërie. Njerëzit dhe organet e tyre trajtohen si mallra që mund të blihen dhe shiten,” komentoi ai.
Vajza e çiftit, Sonia 25-vjeçare, u shpall e pafajshme. Ajo ishte e pranishme në gjykatë dhe përshëndeti prindërit e saj nga distanca teksa policia i shoqëroi ata jashtë sallës së gjyqit.
