Një tjetër grup studentësh, ata të Mjekësisë, i janë bashkuar turmës së protestuesve të mbledhur para Kryemini...
BOTA
"Sonte ka të bëjë me të ardhmen tonë"/ Trudeau fshin lotët gjatë fjalimit: Jam shumë krenar për atë që kemi bërë
E.DPërditësimi i fundit 10 Mars 2025, 19:08
KANADA- Justin Trudeau fshiu lotët nga fytyra e tij gjatë një prej fjalimeve të tij të fundit si kryeministër kanadez. Vajza e tij Ella-Grace e prezantoi në skenë dhe tregoi se sa krenare ishte për të atin dhe bëri shaka se mezi priste ta shihte më pak në rrjetet sociale. Trudeau, dukshëm emocional, fshiu lotët përpara se t’i drejtohej turmës. Në fjalën e tij, Trudeau paralajmëroi për sfidat përpara, veçanërisht ato që dalin nga marrëdhëniet SHBA-Kanada. Ai u bëri thirrje anëtarëve të partisë që të qëndrojnë të përkushtuar.
“Jam shumë krenar për atë që kemi bërë në 10 vitet e fundit. Por sonte ka të bëjë me të ardhmen tonë si parti, si vend. Ne do të veprojmë diplomatikisht kur të jetë e mundur, por do të luftojmë kur duhet. Vendi juaj ka nevojë për ju ndoshta më shumë se kurrë. Dhe nuk kam dyshim se do t’i përgjigjeni thirrjes sepse tashmë e keni bërë këtë. Demokracia nuk është një gjë e dhënë, liria nuk është një gjë e dhënë, madje edhe Kanadaja nuk është një gjë e dhënë”, shtoi ai.
Këto vlera, tha ai, kërkojnë vigjilencë, guxim dhe përkushtim të vazhdueshëm. Trudeau njoftoi në janar se do të tërhiqej pas më shumë se nëntë vjetësh në pushtet pasi popullariteti i tij ra ndjeshëm, duke i detyruar liberalët të zhvillojnë shpejt zgjedhjet e brendshme të partisë për një udhëheqës të ri.
Ish-guvernatori i Bankës Qendrore, Mark Carney ka fituar garën për të udhëhequr Partinë Liberale në pushtet të Kanadasë dhe do të pasojë Trudeau si kryeministër. Carney do të marrë detyrën në një kohë të trazuar për Kanadanë, e cila është në mes të një lufte tregtare me SHBA-në nën presidentin Donald Trump dhe së shpejti duhet të mbajë zgjedhje të përgjithshme.
