Një grup turistësht raportohet se janë helmuar gjatë qëndrimit në ambientet e 'Premium Beach Hotel' në Golem. Ngjarja ka nd...
BOTA
Spanja hap dyert për emigrantët: 500,000 persona pajisen me dokumente - Kushtet
PiranjatPërditësimi i fundit 20 Prill 2026, 18:19
Radhë të mëdha janë krijuar në qytete të ndryshme të Spanjës, pasi qeveria miratoi planin për t’u dhënë status ligjor rreth 500 mijë emigrantëve.
Që nga e hëna, procesi i legalizimit ka hyrë në kulmin e tij, me mijëra qytetarë që presin për orë të tëra në më shumë se 400 pika në të gjithë vendin për të caktuar takime, pasi kanë dorëzuar më herët aplikimet online. Skema u hap zyrtarisht javën e kaluar, pasi u ratifikua nga qeveria socialiste në mbledhjen e kabinetit.
Në Seville, radhët kanë mbushur zyrat e administratës vendore, duke detyruar autoritetet të shqyrtojnë mbylljen e parakohshme të sporteleve për shkak të fluksit të madh.
Për të përfituar nga legalizimi, aplikantët duhet të paraqesin dokumente si dëshmi të një precedenti penal të pastër nga vendi i origjinës dhe prova që kanë qëndruar të paktën pesë muaj në Spanjë para fundit të vitit të kaluar.
Ndërkohë, zyrtarët e emigracionit kishin paralajmëruar grevë për shkak të mungesës së burimeve për përballimin e fluksit, por protesta u anulua pas një marrëveshjeje mes sindikatave dhe qeverisë.
Pavarësisht rritjes ekonomike, çështja e strehimit mbetet problem madhor. Me rreth 140 mijë familje të reja çdo vit dhe vetëm 80 mijë banesa të reja në ndërtim, mungesa e shtëpive të përballueshme po krijon tension social.
Kritikët paralajmërojnë se legalizimi i një numri kaq të madh emigrantësh, pa politika shoqëruese për strehimin, mund të rrisë presionin në tregun e pasurive të paluajtshme, veçanërisht në qytete të mëdha si Barcelona dhe Madrid./PiranjatNews/
