Ish-zëvendëskryeministres Belinda Balluku iu komunikua sot shtyrja e hetimeve nga ana e SPAK deri më janar të vitit 2027. Siç shihe...
BOTA
Sudani njohu pavarësinë e Kosovës, ministria e Jashtme në Prishtinë: Serbia po shkel marrëveshjen e Brukselit me deklaratat e saj
r.llPërditësimi i fundit 15 Prill 2025, 17:11
foto ilustruese
KOSOVË- Ministria e Punëve të Jashtme dhe Diasporës e Kosovës (MPJD) i ka kërkuar Bashimit Evropian dhe komunitetit ndërkombëtar të adresojë veprimet e Serbisë kundrejt Kosovës, pas një deklarate të Ministrisë së Punëve të Jashtmë të Serbisë për njohjen e pavarësisë së Kosovës nga Sudani.
Presidentja e Kosovës, Vjosa Osmani, kishte njoftuar më 12 prill se Sudani e ka njohur pavarësinë e Kosovës. Për këtë vendim, Osmani tha se ishte njoftuar nga ministri i Jashtëm i Sudanit, Ali Yousuf al-Sharif, gjatë Forumit të Diplomacisë në Antalia të Turqisë.
Një ditë më vonë, Ministria e Punëve të Jashtme e Serbisë shprehu "shqetësim serioz" lidhur me, siç u tha, "vendimin e shprehur verbalisht" të shefit të diplomacisë së Sudanit për njohjen e pavarësisë së Kosovës.
Por, MPJD-ja e Kosovës insiston se deklaratat e tilla përbëjnë “shkelje të qartë dhe të papranueshme të detyrimeve të Serbisë sipas Marrëveshjes së Brukselit të lehtësuar nga BE-ja në shkurt 2023 dhe Aneksit të Zbatimit të Ohrit të marsit 2023”.
MPJD-ja bazohet në dy nene të Marrëveshjes së Brukselit, të cilat obligonin Kosovën dhe Serbinë të ““zhvillojnë marrëdhënie normale, fqinjësore të mira me njëra-tjetrën, mbi bazën e të drejtave të barabarta” dhe që përcaktonte se Serbia “nuk do ta bllokojë dhe as nuk do t’i inkurajojë të tjerët të bllokojnë anëtarësimin e Kosovës në organizata ndërkombëtare”.
“Përpjekja e Serbisë për të diskredituar vendimin sovran të Sudanit është jo vetëm shkelje e angazhimeve të saj në kuadër të dialogut, por edhe një fyerje ndaj sovranitetit të Sudanit dhe parimeve themelore të së drejtës ndërkombëtare”, thuhet në deklaratën e MPJD-së.
Në komunikatën e lëshuar më 13 prill, Ministria e Punëve të Jashtme e Serbisë kishte vënë në pikëpyetje legjitimitetin e pushtetit aktual në Sudan.
"Situata aktuale politike në Sudan, e karakterizuar nga pasiguria dhe mungesa e legjitimitetit të pushtetit aktual, vë në dyshim vlefshmërinë e vendimeve të tilla ndërkombëtare", thuhet në deklaratë.
Me njohjen nga Sudani, numri i shteteve që e kanë njohur pavarësinë e Kosovës tani arrin në 119. Kjo është njohja e dytë brenda disa javëve, pas asaj nga Kenia në fund të marsit.
Edhe njohja nga Kenia kishte nxitur reagime dhe kundërreagime të shumta midis zyrtarëve në Kosovë dhe Serbi. Sudani është duke u përballur me krizën më të madhe humanitare në botë, si pasojë e një luftë pothuajse dyvjeçare. Ai është bërë vendi i vetëm afrikan që po përjeton uri ekstreme, sipas Kombeve të Bashkuara.
Pothuajse 25 milionë njerëz - gjysma e popullsisë së Sudanit - përballen me uri ekstreme, ndërsa njerëzit po vdesin në zonat e goditura nga uria në Darfurin Perëndimor, sipas OKB-së.
Konflikti në Sudan nisi më 15 prill 2023, kur tensionet e kamotshme midis udhëheqësve ushtarakë dhe atyre paraushtarakë shpërthyen në kryeqytetin Kartum dhe u përhapën në rajone të tjera, përfshirë zonën e gjerë të Darfurit Perëndimor.
Prej atëherë, thuhet se të paktën 20.000 njerëz janë vrarë, megjithëse numri ka mundësi të jetë shumë më i lartë.
Në fund të muajit të kaluar, ushtria sudaneze e rimori kontrollin mbi Kartum, një fitore e rëndësishme simbolike në luftë. Por, grupi paraushtarak rival, Forcat e Mbështetjes së Shpejtë (RSF), vazhdon ta kontrollojë pjesën më të madhe të Darfurit dhe disa zona të tjera./REL
