Detaje të reja janë mësuar në lidhje me ngjarjen në Roskovec, ku Besmir Mustaj ka qëlluar me armë zjarri në portë...
BOTA
Trump vijon kërcënimet: Edhe me Kolumbinë e Meksikën duhet të bëjmë diçka
PiranjatPërditësimi i fundit 5 Janar 2026, 17:26
Donald Trump ka kërcënuar me një sulm të dytë Venezuelën, nëse zyrtarët që kanë marrë pushtetin në Karakas nuk do të sillen ashtu siç kërkon Uashingtoni. Mesazhi i tij i është drejtuar në veçanti zëvendës presidentes Delcy Rodriguez, e cila u caktua nga Gjykata e Lartë e Venezuelës për të qeverisur vendin pas kapjes së presidentit Nicolas Maduro nga forcat amerikane.
“Nëse nuk bën atë që duhet, atëherë do ta paguajë shtrenjtë, më shtrenjtë se Maduro”, ka thënë Trump, i cili ka kërcënuar edhe vende të tjera latine si Kolumbia dhe Meksika, që sipas tij qeverisen nga kartelet e drogës.
“Kolumbia qeveriset nga një njeri i sëmurë, por që nuk do të jetë në pushtet edhe për shumë kohë. Një operacion në Kolumbi më duket një ide e mirë”, ka vijuar presidenti amerikan.
Sa i takon Meksikës, ai ka përsëritur qëndrimin e tij lidhur me trafikun e drogës dhe emigrantëve. “Duhet të bëjmë diçka. Meksika ka nevojë të rregullohet”, ka vijuar Trump. Edhe Kuba sipas tij është buzë greminës, pasi Havana do ta ketë të vështirë të rezistojë pa u furnizuar me naftë venezueliane. “Nuk besoj se këtu ka nevojë për operacion, gjithçka po shkërmoqet”, ka shtuar shefi i Shtëpisë së Bardhë. Ndërkohë, duke reaguar ndaj deklaratave të Trump, presidentja në detyrë e Venezuelës e ka ftuar presidentin amerikan që të bashkëpunojnë.
“President Donald Trump, populli ynë dhe rajoni ynë meritojnë paqe dhe dialog, jo luftë. Ky ka qenë qëndrimi i presidentit Nicolas Maduro dhe është pozicioni i gjithë Venezuelës në këtë moment”, ka thënë Delcy Rodriguez.
Ajo ka shtuar se vendi i saj synon të jetojë pa kërcënime të jashtme dhe në një klimë respekti dhe bashkëpunimi të ndërsjellë.
