Zelensky në Ankara: Putin nuk do të marrë pjesë në bisedimet për çështjen ukrainase në Turqi

TURQI- Vladimir Putin nuk do të marrë pjesë në bisedimet për çështjen ukrainase në Turqi, njoftoi zëdhënësi i Kremlinit, Dmitry Peskov, ndërsa informacioni rreth vendit dhe kohës së negociatave mbetet kontradiktor.  Bisedimet e drejtpërdrejta, siç u njoftua nga zëdhënësja e Ministrisë së Jashtme ruse, Maria Zakharova, do të fillojnë të enjten pasdite, me delegacionin rus që deklarohet i gatshëm për "punë serioze". Megjithatë, sipas BBC-së, burime ukrainase pohojnë se negociatat do të fillojnë të premten.

Sidoqoftë, sot, Presidenti ukrainas Volodymyr Zelensky do të takohet me Presidentin Recep Tayyip Erdogan në Ankara në orën 13:00, ndërsa vendimet përfundimtare pritet të merren në drekën e punës që do të mbahet në orën 14:00.

Presidenti ukrainas ka mbërritur tashmë në kryeqytetin turk. Megjithatë, mbetet e panjohur nëse ai do të ulet në tryezën e negociatave me dikë tjetër përveç udhëheqësit rus. Nga ana e tij, Presidenti i SHBA-së, Donald Trump, tha nga Doha se mund të udhëtojë për në Stamboll të premten nëse bisedimet midis Rusisë dhe Ukrainës, të cilat janë planifikuar të fillojnë sot, përparojnë.

"Po mendoja të shkoja, por është shumë e vështirë. Nëse ndodh diçka, do të shkoj të premten nëse është e përshtatshme", theksoi Trump nga Katari.

Nga ana e tij, homologu i tij ukrainas Volodymyr Zelensky është planifikuar të takohet sot në Ankara me presidentin turk Rexhep Tajip Erdogan dhe më pas të vendosë për hapat e mëtejshëm në bisedimet e paqes me Rusinë, tha një zyrtar i lartë ukrainas.