Një zjarr në një sipërfaqe pyjore midis fshatrave Andon Poçi dhe Hundëkuq, është konstatuar këtë mbrë...
INVESTIGIME
Firma rumuno-bullgare “Trade Minerals Al” po shkatërron mjedisin dhe infrastrukturën e fshatit Gjegjan në Kukës
PiranjatPërditësimi i fundit 24 Prill 2026, 21:52
Në fshatin Gjegjan të Kukësit, kompania rumuno-bullgare “Trade Minerals Al” ka detyruar burrat e zonës të bëhen bashkë për të denoncuar krimin mjedisor dhe infrastrukturor që është shkaktuar në zonë. Nga aktiviteti i përditshëm me kamionë të tonazhit të rëndë, është shkatërruar rruga që e lidh minierën me fshatin, është shkatërruar ujësjellësi dhe është ndotur mjedisi.
Nga pluhurat e shumta ka rënë riprodhimi i blegtorisë, bletët janë zhdukur, edhe ai pak ujë që banorët e fshatit e përdorin për të pirë është i ndotur dhe me përmbajtje squfuri, i dëmshëm për jetën e njerëzve.
Në vitin 1974, në kohën e monizmit, janë ndërtuar 3 ura me gurë, të cilat konsiderohen vepra arti, por tani janë dëmtuar dhe janë në rrezik shembjeje për shkak të aktivitetit të kompanisë “Trade Minerals Al”.
Banorët e zonës janë ankuar tek kryetari i Njësisë Administrative Izmir Veseli, tek kryetari i Bashkisë Albert Halilaj, tek prefekti i qarkut Kukës, në polici, prokurori dhe SPAK, por nuk kanë marrë asnjë përgjigje për krimin mjedisor që kjo kompani e huaj ka shkaktuar në zonë.
Në bazë të dokumentacioneve që ata disponojnë, kanë konstatuar se aktiviteti i kompanisë u ka dëmtuar tokat bujqësore, livadhet dhe vreshtat, si pasojë e hapjes së rrugëve të reja të kalimit, duke cenuar të drejtën e pronësisë.
Për shkak të gërrmimeve që firma ka kryer, në tokat që u përkasin fshatarëve të zonës janë krijuar duna dheu, në vend që ato të depozitoheshin në landfille të posaçme dhe toka e fshatit të pyllëzohej e të ishte e vlefshme për blegtorinë./piranjat news
Të gjitha të drejtat e këtij materiali janë pronë ekskluzive dhe e patjetërsueshme e Piranjat.al sipas ligjit Nr. 35/2016 “Për të drejtën e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi pa autorizimin e Piranjat.al në të kundërt çdo shkelës do të mbajë përgjegjësi
