Florian Binaj si Kryeministri Rama në skenë

TIRANË- I dashur popull, të dashur çyrykë, të dashur patronazhistë e patronizhiste. Si fillim, dua t’ju them që për pak më trëmbët, nja dy ditë. Kujtova se kësaj radhe do të bënit si moralistë dhe nuk do i merrnit lekët dhe nuk do e hanit presionin për vendin e punës. Por, ju jeni popull i mrekullueshëm. Prandaj, siç e ka thënë dhe HarrY Fultz, lum kush do e sundojë këtë popull. Mos duartrokit ti aty, se nuk e ka thënë Fulzi. E kam thënë unë.

Dua të filloj me një falenderim të madh. Faleminderit që, edhe pse nuk realizova asgjë, edhe pse nuk ju dhashë asgjë, edhe pse kam gjysmën e bashkëpunëtorve në burg, edhe pse talla atë që s’thuhet me atë europën në 2030-n, ju më dhatë 11 mandate më tepër! Këtë fitore, jua dedikoj ju! Ju që votuat që absolutisht asgjë të mos ndryshojë!

Çmimet e larta të banesave, çmimet e larta të shportës ushqimore, mungesa e ilaçeve, trafiku, rrugët me pagesë, miliardat e korrupsionit, kullat përmbi sitet arkeologjike, zaptimi i bregdetit, shpikja e investitorëe strategjikë, skandalet korruptive dhe seksuale të vartësve të mi, ndotja, zhdukja e hapësirave të gjelbra, kolapsi i fshatit etj. Gjithçka të ndyrë që mund të bëjë dikush që e urren me shpirt këtë vend dhe këtë popull, e bëra unë. Dhe ju sërish më votuat. Faleminderit nga zemra! Ju premtoj solemnisht që jo vetëm asgjë nuk do ndryshojë, por do të bëhet 2-fish më keq. Dhe ju e dini mirë, kur unë them 2-fish më keq, në fakt nënkuptoj 5-fish më keq!
Do të falënderoj veçanërisht 2 zona:

Së pari, fshatin artist të Hotolishtit! Ju protestuat me arkivol për muaj të tërë për rrugën që ju shkatërron cilësinë e jetës dhe përsëri më votuat! Ju premtoj që jo veëtm ju, po të 8 fshatrave të Hotolishtit, do t’ju jap një arkivol edhe më të madh! Jo vetëm fshatin do t’jua ndaj më katërsh, por edhe shtëpitë do t’jua ndaj përgjysëm, që për të shkuar në banjë të merrni makinën dhe t'i bini rrotull lagjes! Dhe mbi të gjitha, Tragjasi ynë me tradita – u ankuat se ujin jua mori kuçedra e qeverisë sime, dhe prapë votuat masivisht kuçedrën. Ju premtoj, që ujin do jua sjellim. Me shishe plastike. Për ju, premtimi im është ofertë, 500 lek shishja... e madhe sigurisht.

Shokë e shoqe patronazhistë, sufllaqistë, çyrykë dhe enveristë. Ju votuat që gjërat të mbeten njësoj. Ju jap fjalën, që nuk do jetë kështu. Kur ju kisha premtuar që nuk kishit parë gjë akoma, e dija se do t’ia arrinim kësaj dite. Por sërish ka ende vend për ta bërë më keq. Prandaj kam vendosur që në katërvjeçarin e ardhshëm, problemet tuaja të katërfishohen! Se vetëm kështu, ju do të keni entuziasmin e duhur për të më dhënë 94 vota në mandatin e pestë. Zgjedhjet janë lodhje, kosto, dhe s’kam më as nerva. Dil në fusghatë, gënje, bli, shit, mbush thasët. Boll më! Me 94 vota, këtij stresi do i japim fund! Me 94, do të përmirësojmë kushtetutën:

● Kryeministria do të bëhet e trashëgueshme, si puna e flokëve apo talentit në pikturë.
● Kryeministri të mund të zgjidhet që nga mosha 15-vjeçare. Se populli ka nevojë për energji të reja! T’u hapim rrugë fëmijëve. E keni parasysh për kë e kam fjalën.

Dhe mos harroni, sivjet ju dhashë disa parti të vogla opozitare. Pas 4 vjetësh do ju jap 10. Ju nuk keni nevojë për një opozitë; juve ju duhet 10 opozita të vogla që t’i bëjnë opozitë njëra - tjetrës Kështu edhe unë do të mund t’i bëj gjithnjë e më keq gjërat, për të shtuar edhe më shumë hallet tuaja.

Pasi kleringu me vende pune nuk mund të funksionojë më sepse kemi administratë më shumë se popull, në zgjedhjet e ardhshme, premtoj që do standardizojmë çmimin e votës. E di që shumë prej jush jeni goditur ekonomikisht, sidomos nga rënia e Euros javën para zgjedhjeve, që kuptohet, ka një arsye. Prandaj ju premtoj që në zgjedhjet e radhës do të kemi një çmim fiks dhe të arsyeshëm. (Dikush nga salla reagon.) Mos u nxeh fare! Ti që reagon aty, e di shumë mirë që për mua ke votuar. Rri rehat, se ato 150 euro do t’i marrim në formë tjetër!

Së fundmi, ato miliona euro gjoba që jua fala…. ju që i kishit paguar gjobat tuaja e nuk përfituat dot, ju jeni, si ta them, “çyrykë ekonomikë”, ose autikë politikë! Ju falenderoj edhe një herë, me sinqeritet cinik dhe të thellë!
Të gjithë bashkë për himnin e Flamurit! Mbyllet me brohorima “Parti – Enver!”