Një pedagoge ka shpërthyer kundër kryeministrit Edi Rama, duke e cilësuar si turpin e vendit, dhe duke shtuar se ai duhet të largohet...
INVESTIGIME
OSHEE “zvarrit” qytetarin, nuk i lidh energjinë edhe pas vendimit të gjykatës
e. dPërditësimi i fundit 25 Tetor 2024, 22:31
TIRANË- Problemet e qytetarëve me OSHEE-në në Shqipëri nuk kanë fund. Kristinës, zonjës nga Paskuqani i refuzohet për gati 10 vite furnizimi me energji elektrike.
“Në vitin 2005, familja ime ka kaluar me punë në Greqi dhe nga ajo ditë deri në ditët e sotme ne jetojmë atje. Më refuzohet lidhja e energjisë elektrike që nga viti 2017 deri në ditën e sotme. Arsyeja e moslidhjes së energjisë është që unë kam dalë debitore pa e ditur, afër 5 milion lekë të vjetra nga OSHEE. Unë nuk kam pasur as sahat, asgjë”
Pra për ta qartësuar, lidhje energjie nuk kishte, por pagesat vazhdonin me sistemin e famshëm të aforfesë.
“Kjo na ra si bombë, sepse ishte absurde. Ne nuk kishim dijeni se nga ishte ai kabull, nga cila dera ishte futur kjo energji. Pastaj jemi interesuar në çdo zyrë pse nuk na pranohet lidhja e energjisë dhe thonë paguaj debitin, që ta lidhim. Kurrë në botë jo. Pastaj u detyruam të marrim avokat, fituam gjyqin e parë dhe pastaj OSHEE na çoi në gjykatën e apelit dhe në janar na dha të drejtë, që nuk jemi debitorë dhe të lidhet energjia”
Por edhe pse kanë kaluar më shumë se tetë muaj, OSHEE nuk e ka zbatuar ende vendimin e gjykatës. Për këtë arsye, Piranjat u drejtua pranë zyrave të OSHEE.
"Sipas vendimit të gjykatës, rezulton që këto debi nuk i takojnë abonentit. Kontrata është fiktive.
Kështu që, OSHEE e ka marrë vendimin dhe ka ekzekutuar, le të themi, këtë vendim në gjykatë për t'i fshirë detyrimet që kishte abonenti deri në vitin 2010. Por pas 2010, familja rezulton sërish debitore në vlerën 800 mijë lekë të vjetra, por duke qenë që prej gjykatës doli që kjo kontratë është fiktive, pra nuk ekziston, ne po e marrim të mirëqenë që edhe këto detyrimet nuk janë. Gjithsesi, e rëndësishme është që abonenti me po ato dokumenta të bëjë një riaplikim dhe ne direkt do të marrim të gjitha masat për të bërë azhornimin në energji elektrike për të bërë matjet e duhura, verifikimet e duhura dhe t’i hapet një kontratë e re, duke vendosur një matës të energjisë elektrike”, tha Ardi Kola, zëdhënës i OSHEE.
Bazuar në këto fjalë, Kristina e bëri riaplikimin dhe pas pak ditësh, grupi i terrenit mbërriti në shtëpinë e saj për t’i lidhur energjinë.
“Më në fund do kem drita edhe unë si gjithë tjerët. Jam shumë e lumtur sot”
