Një qytetar ka denoncuar për Piranjat news se një person, të cilin e identifikon si Xhejsi Selenica, publikon në rrjetet sociale vide...
INVESTIGIME
Ligji i paqartë i tërmetit që po penalizon familjet shqiptare
e. dPërditësimi i fundit 25 Tetor 2024, 21:36
KURBIN- Procesit të rindërtimit pas tërmetit të 26 nëntorit 2019 duket sikur nuk do t’i vijë fundi kurrë. Ka ende shumë familje që nuk kanë gjetur një zgjidhje e të tjera që janë skualifikuar. I tillë është edhe rasti i familjes Marku në Kurbin.
“Në mbledhjen e Këshillit Bashkiak të realizuar me datë 10 janar 2022 është marrë vendimi që pallatet e dëmtuara nga niveli ds4 të kalojnë në nivelin ds5 dhe të shkatërrohen komplet. Me datën 26 qershor të vitit 2024 këshilli Bashkiak Kurbin është mbledhur dhe ka votuar një listë me banorët që do të përfitonin prona. Në këtë listë, familja ime, im atë, nuk ishte përfitues i pronës. Për këtë, iu drejtuam bashkisë me letër zyrtare për të marrë informacion se pse ne nuk e përfitojmë këtë pronë dhe përgjigja që bashkia na kthen e përmbledhur është sepse ju nuk e përfitoni pronën për shkak se ju keni një pronë të dytë që është pjesë e pasurisë familjare. Në muajin korrik të vitit 2021, ne morëm një pronë, që na u dhurua, që është në një bashki tjetër, në atë të Krujës”, thotë Julvin Marku.
Në 19.07.2021 famija e Zef Markut, babait të Julvinit, përfitoi me kontratë dhurimi nga një i afërm i tyre, një ndërtesë në fashtin Gramëz, në njësinë administrative të Thumanës. Dhe ishte pikërisht ky veprim, që i penalizoi duke ju hequr të drejtën për të përfituar pronën që kishin në Kurbin, për të cilën disponojnë edhe certifikatën e pronësisë që nga viti 2011. Për të dalë me këtë vendim, bashkia dhe komisioni i posaçëm i rindërtimit janë bazuar në pikën 3 të aktit normativ nr. 9 i datës 16.12.2019 ku thuhet:
“Nuk është subjekt përfitues individi ose familja që ka në pronësi ose në posedim të ligjshëm më shumë se një banesë, në njësinë e vetqevrisjes vendore ku është shpallur gjendja e fatkeqësisë natyrore, pavarësisht nëse banesa që është dëmtuar nga fatkeqësia natyrore ka qenë vendbanim i zakonshëm. Në rast se të gjitha banesat në pronësi, ose në posedim janë dëmtuar nga fatkeqësia natyrore, individi ose familja përfiton sipas parashikimeve të këtij akti, vetëm për banesën që në datën e fatkeqësisë natyrore përdorej si vendbanim i zakonshëm”
“Në momentin e ndodhjes së tërmetit familja ime kishte në pronësi vetëm një pronë, që është prona në fjalë, e cila është dëmtuar nga tërmeti. Por nuk është futur historiku se si është përfituar kjo pronë dhe data se kur kjo pronë është bërë e jona. Mendoj se ka dy momente shumë të rëndësishme. Prona është dhuruar, ç’ka do të thotë, ka ardhur jo nga pasuria jonë, por ka ardhur si dhurim. Dhe fakti tjetër i rëndësishëm është që prona është marrë pasi janë mbyllur të gjitha aplikimet e dosjes dhe përfituesit të tërmetit”, shprehet Julvini.
“Në asnjë nen të VKM-ve që kanë dalë pas vitit 2019, ku përcaktojnë kriteret se si dhe kush përfiton nga programi i rindërtimit nuk është e cilësuar që nëse ti mbas vitit 2019, kur ka rënë tërmeti vazhdon jeton dhe zhvillohesh duke përfituar banesa të tjera, nuk ke të drejtë që të përfitosh nga aplikimi për fondet e rindërtimit”, thotë avokati Elton Laska.
Por marrja e një prone të dytë pas tërmetit, nuk është arsyeja e vetme që Bashkia e Kurbinit i përjashton nga programi i rindërtimit. Sipas një dokumeti të fundit, institucioni në fjalë thotë se dosja e Zef Markut u pzullua për aryse se Komisioni i Posaçëm e pa të nevojshme të verifikonte vendbanimin e kësaj familjeje. Dhe pas verifikimit rezultoi që kjo familje të ketë qenë banore e njësisë administrative Thumanë, Bashkia Krujë, si në kohën e rënies së tërmetit ashtu edhe në momentin e aplikimit e deri më datë 24.10.2022.
Diçka e tillë nuk është e parashikuar në aktin normative nr.9, ku janë mbështetur institucionet për të përzgjedhur familjet që përfitojnë nga procesi I rindërtimit. Megjithatë punonjësit e bashkisë së Kurbinit e justifikuan marrjen e vendimit nga ana e tyre me interpretimin e ligjit. Sipas tyre akti normativ ka shumë paqartësi, gjë që ka sjellë konflikte mes institucioneve dhe familjeve shqiptare.
