Përdoruesit e platformave Facebook, Instagram dhe Messenger kanë raportuar probleme me funksionimin e tyre pasditen e së mërkurës, 22...
KOSOVA
Dyshohet se vrau vëllezërit e bashkëshortes, lihet në burg Astrit Isufi
PiranjatPërditësimi i fundit 9 Nëntor 2025, 10:13
Gjykata Themelore në Gjakovë ka caktuar masën e paraburgimit ndaj Astrit Isufit, i dyshuar për vrasjen me armë zjarri të dy vëllezërve të bashkëshortes së tij, Driton dhe Naim Morina. Për shkak të gjendjes së tij shëndetësore, seanca është mbajtur në ambientet e QKUK-së në Prishtinë, ku Isufi po merr trajtim mjekësor pas plagosjes. Gjyqtari i procedurës paraprake, Drilon Haraçia, vlerësoi se lirimi i të dyshuarit do të rrezikonte rrjedhën e hetimeve, përfshirë mundësinë e arratisjes apo ndikimin tek dëshmitarët, ndaj vendosi që ai të qëndrojë në paraburgim deri më 6 dhjetor 2025.
Astrit Isufi, i cili u arrestua më 7 nëntor në fshatin Plloçicë pas më shumë se 15 orësh në arrati, dyshohet se qëlloi për vdekje dy vëllezërit e gruas së tij në fshatin Gollubovc të Malishevës. Në vendin e ngjarjes janë gjetur dy armë zjarri, ndërsa motivet e sakta të vrasjes ende nuk janë bërë të ditura.
Policia konfirmoi se i dyshuari është plagosur gjatë ngjarjes, ndërsa gjendja e tij shëndetësore është stabile. Isufi kishte një histori të dhunës në familje. Në prill 2025, Gjykata Themelore e Prishtinës e kishte dënuar me burg dhe gjobë për rrahje dhe kërcënim ndaj bashkëshortes së tij, dënim i cili më pas u ul nga Gjykata e Apelit në tre muaj burgim. Në dosje përshkruhen episode të dhunës brutale ndaj gruas, kërcënime për vrasje dhe posedim i paligjshëm i armës – elemente që tani hedhin dritë mbi rrethanat e rënda që i paraprinë tragjedisë në Malishevë.
