E paditi për shpifje në GJKKO, Shehaj: Politikanët e korruptuar kanë hedhur baltë mbi partinë time, Adriatiku s’është as i pari dhe as i fundit që më kallëzon

agron shehaj

TIRANË-  Kreu i Partisë Mundësia, Agron Shehaj ka reaguar pasi drejtuesi i “Shqipëria Bëhet”, Adriatik Lapaj e paditi në GJKKO për shpifje. Shehaj u shpreh se politikanët e korruptuar kanë hedhur baltë mbi partinë e tij, ndërsa tha se vjehrri i Lapajt është ai që ka dhënë vendimin për njohjen e një prone në bregdet, duke theksuar se ky veprim ka ndodhur në shkelje të ligjit.

I ftuar në News24, ai ka akuzuar Adriatik Lapajn se ka qenë avokati i përfituesit të tokës, duke i kërkuar atij të dalë publikisht dhe të shpjegojë se si është e mundur që një vendim i dhënë nga vjehrri i tij është konsideruar normal nga Lapaj. Shehaj ka theksuar se prona për të cilën bëhet fjalë është dhënë në shkelje të ligjit dhe ka shtuar se Lapaj nuk është as i pari, as i fundit që e akuzon për shpifje.

"Politikanët e korruptuar kanë hedhur baltë mbi partinë Mundësia. Vjehrri i tij ka njohur pronën një zotërie. Adriatik Lapaj ka qenë avokati i përfituesit nga vendimi i vjehrrit për tokën. Adriatiku duhet të dalë në publik dhe të shpjegojë sesi është e mundur kjo. Lapaj thotë se unë jam e ardhmja, për atë është normale një vendim i tillë që ka marrë vjehrri i tij. Prona që po flas unë është dhënë në shkelje të ligjit. Adriatiku s’është as i pari e as i fundit që më kallëzon për shpifje.", shprehet Shehaj. 

Ndërkohë pak më herët në një postim në rrjetet sociale, ku ka publikuar edhe padinë ndaj Shehajt, Lapaj shprehet se këtij të fundit i ka shtrirë dorën e bashkëpunimit për 8 muaj, por sipas tij në këmbim ka marrë shpifje. Lapaj shprehet se sulmi i Shehajt ndaj tij ishte edhe më i madh se ndaj atyre që "e kanë vjedhur Shqipërinë 34 vite".  Ai tha se luftën e ka me sistemin dhe pushtetin, por shtoi se kushdo e sulmon duke shpifur do të marrë përgjigjen rast pas rasti.

agron shehaj