Protestat në Tiranë vijojnë me përplasje mes demonstruesve dhe policisë së rendit, shkruan BBC. Nxënësit e shkollave t...
POLITIKE
"Gjyqtarja Iliriana Olldashi po kërcënohet për rastin e Veliajt"/ Apeli i GJKKO përgënjeshtron denoncimin e Këlliçit: Nuk ka patur ndërhyrje lidhur me funksionin e saj!
b.zPërditësimi i fundit 14 Shkurt 2025, 16:17
Apeli
TIRANË - Gjykata e Posaçme të Apelit për Korrupsionin dhe Krimin e Organizuar, ka reaguar në lidhje me deklaratat e Belind Këlliçit i cili u shpreh një ditë më parë se gjyqtarja Iliriana Olldashi po kërcënohet. Këlliçi në reagimin e tij denoncoi se ndaj gjyqtares Olldashi kishte mesazhe, si joshëse ashtu edhe kërcënuese, për të favorizuar Erion Veliajn dhe për të anashkaluar ligjin
Por në reagimin zyrtar, Gjykata e Apelit ka përgënjeshtruar reagimin e Këlliçit. Në njoftim thuhet se në asnjë rast nuk ka patur dhe nuk ka ndërhyrje ose ushtrim të ndikimit të papërshtatshëm lidhur me funksionin e gjyqtares së kësaj Gjykate, magjistrate Iliriana Olldashi.
Njoftimi i Gjyaktës së Apelit:
Me synimin e përgënjeshtrimit të informacionit të pasaktë, të publikuar në datën 13.02.2025 dhe të cituar në media të ndryshme edhe më datë 14.02.2025, të cilat dëmtojnë imazhin e paanësisë dhe drejtësisë së gjyqtarit, dhe, në rastet më të rënda, të vetë funksionit gjyqësor, Shërbimi për Marrëdhëniet me Publikun dhe Median pranë Gjykatës së Posaçme të Apelit për Korrupsionin dhe Krimin e Organizuar, bën me dije publikun dhe median se, në asnjë rast nuk ka patur dhe nuk ka ndërhyrje ose ushtrim të ndikimit të papërshtatshëm lidhur me funksionin e gjyqtares së kësaj Gjykate, magjistrate Iliriana Olldashi.
Njoftimi i mësipërm përcillet në dijeninë e publikut dhe medias në garantim të ruajtjes dhe forcimit të besimit të publikut tek sistemi i drejtësisë si dhe, në përputhje me parimet e korrektesës, vetëpërmbajtjes dhe maturisë së gjyqtarit, të përcaktuara në pikën 5, të nenit 3, të ligjit nr. 96/2016 “Për statusin e gjyqtarëve dhe prokurorëve në Republikën e Shqipërisë”.
