I shoqëruar nga Gjikuria/ Beleri rikthehet në burg: Nuk përdora imunitetin tim si eurodeputet! Kam kërkuar lirim me kusht

Beleri

FIER- Eurodeputeti, Fredi Beleri është kthyer pasditen e sotme në burgun e Fierit për të kryer dënimin e mbetur pas betimit të tij në Parlamentit Europian. Para se Beleri të rikthehej në ambientet e burgut Beleri ka mbajtur një prononcim para mediave.

Beleri u shpreh se ka kërkuar lirinë me kusht. Ai më tej theksoi se nuk e përdori imunitetin e tij si eurodeputet dhe u rikthye në burg ndërsa tha se shpreson që drejtësia të veprojë kësaj here pa u ndikuar.

I shoqëruar nga kandidati i opozitës për Himarën Petro Gjikuria, Beleri vlerësoi kandidaturën e tij ndërsa shtoi se ai nuk ka lidhje me mercenarët që sjell pushteti për të komanduar Himarën.

"Siç u kisha thënë, u ktheva sot në burg. Nuk përdora imunitetin tim si eurodeputet. U ktheva se këtu në Shqipëria është shtëpia ime dhe jam i bindur për drejtësinë time, në mos gjykatat këtu, në gjykatat europiane. Jam shumë i gëzuar që më shoqëroi sot në burg kandidati për bashkinë e Himarës Petro Gjikuria një djalë i mirëfilltë nga Himara që s’ka lidhje me mercenarët që sjell pushteti për të komanduar Himarën.

Himara në duart e Petro Gjikurisë do jetë e sigurt, do ketë vend në Bruksel, Amerikë dhe që këtej e tutje na presin vetëm ditë të mira. Për mua ishte një eksperiencë e veçantë, isha i gëzuar, emocionuar dhe i kënaqur nga besueshmëria e votuesve grekë. Atje është një detyrim i madh dhe një angazhim për të dalë faqebardhë dhe për të mbështetur të drejta tona.

Kam kërkuar lirim me kusht, e drejtë e imja, dhe shpresoj që drejtësia këtë herë të mos ndikohet. Nuk më vajti në mendje të mos kthehem se këtu është shtëpia ime, këtu është jeta ime. Nuk kam arsye të mos kthehem.

fredi beleri