Kongresi i Partive Popullore Evropiane, Berisha: Do të mbaj fjalën time atje dhe do paraqes të vërtetat e Shqipërisë dhe shqiptarëve

sali berisha

TIRANË- Kryetari i Partisë Demokratike, Sali Berisha tha se do të mbajë fjalën e tij në kongresin e Partive Popullore Evropiane ku tha se do të marrin pjesë 13 kryeministra dhe të gjithë  kryetarët. Berisha tha se ai kongres është një ngjarje shumë e madhe, për jetën e Partisë Popullore dhe Partisë Demokratike si anëtare e asociuar e kësaj organizate. Ai u shpreh se në fjalimin e tij atje do të paraqesë të vërtetat e Shqipërisë dhe shqiptarëve

"Është kongresi i Partive Popullore, ku marrin pjesë 13 kryeministra dhe gjithë kryetarët dhe unë jam e do të mbaj një fjalë, më është përcaktuar koha, më është dhënë koha të mbaj dhe unë fjalën e time e do të shkoj. Do të përpiqem ta ekonomizoj kohën në mënyrën sa më racionale.

Ajo është një ngjarje shumë e madhe, për jetën e Partisë Popullore dhe Partisë Demokratike, si anëtare e asociuar që është e kësaj organizate. Jam i nderuar që do të shkoj dhe të paraqes Shqipërinë, të vërtetat siç i ka Shqipëria dhe u them unë ju, që kjo paraqitje e të vërtetave të Shqipërisë, do të ndihmojë shumë, Shqipërinë dhe shqiptarët.", tha Berisha.

Më 25 mars, kreu i PD-së u ftua për të marrë pjesë si kryetar i Partisë Demokratike të Shqipëriës në Kongresin e Partive Popullore Evropiane (PPE) 2025, që do të mbahet më 29-30 Prill në Valencia, Spanjë. Shkresa është firmosur nga Manfred Weber, presidenti i PPE-së, dhe Alberto Núñez Feijóo, kreu i Partisë Popullore të Spanjës, teksa në këtë event pritet të diskutohet për drejtimin e ardhshëm të PPE-së dhe të Bashkimit Evropian.

Në Kongresin e PPE-së do të zhvillohen zgjedhjet për presidencën e re të partisë, si dhe votime mbi rezoluta dhe ndryshime statutore për të modernizuar dhe përgatitur PPE-në për sfidat e reja. Gjithashtu, më 29 Prill, Berisha është i ftuar në Darkën e Liderëve, ku do të marrin pjesë kryeministra, zëvendëskryeministra dhe liderë të opozitës nga vendet anëtare dhe jo-anëtare të BE-së.

sali berisha konresi i partive popullore evropiane