Policia e Tiranës ka intensifikuar kontrollet ndaj automjeteve luksoze që qarkullojnë në kryeqytet sot në 6 shtator.
Në fokus t...
POLITIKE
Maliqi: Gjykata e Lartë foli qartë, Hajdari i Bashkisë së Kuçovës duhet të ishte shkarkuar
PiranjatPërditësimi i fundit 28 Prill 2026, 17:55
Lefter Maliqi ka reaguar pas vendimit të Gjykatës së Lartë, duke akuzuar institucionet shtetërore për mosveprim dhe shkelje të ligjit në lidhje me mandatin e kryebashkiakut të Kuçovës, Kreshnik Hajdari. Maliqi theksoi se Hajdari duhej të ishte shkarkuar dhe arrestuar prej kohësh, pasi mbi të rëndojnë një dënim penal dhe disa kallëzime në SPAK.
Ai akuzon Komisionin Qendror të Zgjedhjeve se ka shmangur me vetëdije marrjen e një vendimi përfundimtar, duke mos zbatuar ligjin e dekriminalizimit dhe duke lejuar mbajtjen e mandatit.
Postimi:
Gjykata e Lartë foli qartë: Hajdari i Bashkise se grabitur te Kucoves duhet te ishte shkarkuar,arrestuar dhe burgosur me kohe pasi mbi te rendojne denim dhe 10 kallezime ne SPAK! U konfirmua se KQZ ka shkelur ligjin duke ndihmuar mbajtjen e mandatit të grabitur nga Kreshnik Hajdari në Bashkinë Kuçovë.
Ky vendim gjyqësor përkthehet thjesht: KQZ nën drejtimin e Ilirjan Celibashit, nuk zbatoi ligjin dhe shmangu me vetëdije vendimmarrjen e tij për mandatin e Kreshnik Hajdarit, të bashkisë Kuçovë. Në vend që të zbatonte vendimin detyrues të KAS dhe të merrte një vendim për mandatin e Hajdarit, Celibashi zgjodhi të “blejë kohë” me një shpikje procedurale, pezullimin e çështjes (procedurë që nuk kishte ndodhur në rastet e dekriminalizimit). Por Ligji i dekriminalizimit është i qartë: fshehja e një dënimi penal të formës së prerë sjell humbjen e mandatit. Kaq e thjeshtë. Nuk kishte asnjë nevojë për manovra, as për shtyrje artificiale. Kreshnik Hajdari ka fshehur dënimin e tij nga Gjykatat Greke. Kaq mjaftonte t’i hiqej mandati i Bashkisë Kuçovë.
Ndërkohë, edhe pas vendimit penal të formës së prerë për falsifikim formulari nga Gjykata e Posaçme, institucionet vijuan të heshtin. Këshilli i Ministrave, në vend që të mblidhej dhe të ndërmerrte procedurën për shkarkimin e një kryetari bashkie të dënuar, nuk reagoi fare. Edhe kjo është një paligjshmëri e rëndë.
Pra, për vite me radhë, u krijua një zinxhir shkeljesh nga shumë institucione të Shtetit: mosveprim i qëllimshëm nga KQZ dhe heshtje e pajustifikueshme nga Këshilli i Ministrave. Kreshnik Hajdari nuk ka mbrojtur dot as juridikisht dhe as moralisht këtë mandat të grabitur në 2023 koalicionit “Bashkë Fitojmë” dhe opozitës së bashkuar. Dhe kjo u provua në çdo shkallë gjykimi.
Kjo histori është një shembull i pastër i abuzimit me detyrën: shkelje ligji, zvarritje e qëllimshme dhe deformim i vullnetit të qytetarëve të Kuçovës.
Për 3 vite, vota e qytetarëve të Kuçovës në favorin tim u mbajt peng.
Sot është e qartë: askush nuk është mbi ligjin dhe çdokush që ka shpërdoruar detyrën do të mbajë përgjegjësi herët a vonë, nga i pari tek i fundit, për veprimet apo mosveprimet me të cilat kanë shkelur ligjin, kanë abuzuar me detyrën dhe kanë dëmtuar interesat e zgjedhësve të Kuçovës dhe demokracinë shqiptare.
