Gjatë ditës së sotme janë raportuar 30 vatra zjarri në territorin e vendit, prej të cilave 7 mbeten aktive, 10 janë në...
POLITIKE
Marrëveshja Itali-Shqipëri për emigrantët, Meloni: Edhe Këshilli i Evropës legjitimon ndjekjen e një modeli të tillë
PiranjatPërditësimi i fundit 16 Maj 2026, 13:24
Kryeministrja italiane Giorgia Meloni, ka deklaruar se modeli i ngritur nga Italia në Shqipëri për menaxhimin e emigrantëve, po kthehet tashmë në një qasje të mbështetur nga vendet europiane.
Përmes një reagimi në rrjetet sociale, Meloni komentoi deklaratën e miratuar në Chișinău nga ministrat e Jashtëm të 46 shteteve anëtare të Këshilli i Europës.
Sipas saj, deklarata njeh të drejtën e shteteve për të përdorur “zgjidhje inovative” në menaxhimin e flukseve migratore, duke përfshirë edhe qendrat e riatdhesimit në vende të treta, sipas modelit të nisur nga Italia në Shqipëri.
“Një rezultat i rëndësishëm, fryt i një rruge që Italia ka kontribuar ta hapë me guxim dhe vendosmëri së bashku me kryeministren daneze Mette Frederiksen”, shkroi Meloni.
Ajo theksoi më tej se ajo që një vit më parë konsiderohej një ide e debatueshme, tashmë është kthyer në një parim të përbashkët mes vendeve anëtare të Këshillit të Europës.
“Qasja italiane për një menaxhim të rregullt të emigracionit, e ndjekur me seriozitet dhe koherencë nga qeveria jonë, sot është bërë edhe qasja e Europës”, u shpreh kryeministrja italiane.
Çfarë parashikon Deklarata e Chisinau
Gjatë Sesionit të 135-të Ministror të Komitetit të Ministrave të Këshilli i Europës në Moldavi, nën presidencën moldave, u miratua me konsensus Deklarata e Chisinau për migracionin dhe Konventën Europiane të të Drejtave të Njeriut.
“Deklarata riafirmon të drejtat e pacenueshme të të gjithë personave të përfshirë dhe njeh nevojat legjitime të sigurisë së shteteve dhe qytetarëve”, deklaroi zëvendësministri italian i Jashtëm Massimo Dell’Utri gjatë ndërhyrjes së tij.
“Është thelbësore të mund t’u përgjigjemi sfidave të sotme me instrumente të reja”, vijoi ai, duke theksuar se dokumenti njeh nevojën për të përballuar në mënyrë efikase dhe të shpejtë sfidat që vijnë nga emigracioni i paligjshëm, me qëllim forcimin e mbrojtjes së kufijve dhe garantimin e sigurisë kombëtare.
Sipas deklaratës, kjo mund të realizohet edhe përmes instrumenteve inovative të bashkëpunimit me vendet e treta në menaxhimin e flukseve migratore, si dhe në luftën kundër trafikimit të emigrantëve dhe krimit të organizuar.
Dokumenti riafirmon njëkohësisht rolin qendror të Konventës Europiane të të Drejtave të Njeriut si shtyllë e rendit juridik europian.
Ndërkohë, 46 shtetet anëtare të Këshillit të Europës kanë ripërsëritur mbështetjen e tyre të fortë për Ukrainë, veçanërisht për instrumentet ndërkombëtare që synojnë përcaktimin e përgjegjësive të Rusisë për agresionin ndaj Kievit.
Gjithashtu, 36 shtete, mes tyre edhe Italia, si dhe Bashkimi Europian, kanë miratuar vendimin për krijimin e Tribunalit Special për krimin e agresionit kundër Ukrainës, si një hap konkret drejt drejtësisë ndërkombëtare dhe arritjes së një paqeje të drejtë dhe të qëndrueshme.
