Gjykata Penale e Tiranës pritet të marrë në shqyrtim gjatë ditës së sotme 28 masa që lidhen me protestën e zhvill...
POLITIKE
Me tre drejtorë në burg, Çuçi "harron" dhe Ramën për Veliajn: Është kryetari i bashkisë me i suksesshëm që ka pasur Tirana dhe PS në këto vite
r.llPërditësimi i fundit 24 Korrik 2024, 13:17
erion veliaj, bledi cuci
TIRANË- Kreu i Grupit Parlamentar të Partisë Socialiste, Bledi Çuçi në konferencën e sotme me gazetarët, ka ngritur "në qiell", me lavde, kryebashkiakun e Tiranës, Erion Veliajn. Aq sa Çuçi e ka cilësuar si "kryetari i bashkisë me i suksesshëm që ka pasur Tirana dhe PS në këto vite", ndonëse tre nga drejtorët e bashkisë së tij janë në qeli dhe akuzohen nga Apeli i GJKKO si grup i strukturuar kriminal.
Mes aferave që "rrotullohen" rreth Veliajt si ajo e Inceneratorit të Tiranës dhe Kompanisë "5D", Çuçi tha se Veliaj ka mbështetjen absolute nga grupi i PS dhe shtoi "se nuk e bën pis asnjëlloj balte që hidhet ndaj tij", pasi sipas tij ka bërë punë me vepra e jo me fjalë.
"Erion Veliaj është kryetari i bashkisë me i suksesshëm që ka pasur Tirana dhe PS në këto vite. Transformimi historik i Tiranës është një realitet që nuk mund ta bëjë pis asnjëlloj balte që mund të hidhet mbi figurën e kryetarit. Ne jemi të nderuar që kemi zgjedhur nga gjiri i jonë apo nga pjesa jonë një kryetar bashkie që nderon jo vetëm Tiranë po përtej Shqipërisë, çdo socialist apo çdo tirons, me vepra dhe jo me fjalë. Çështjet e tjera janë çështje që lidhen me sektorët ligjzbatues. Grupi i PS i jep mbështetjen absolute Veliajt."- tha Çuçi.
Gjatë nderimeve për Veliajn, Çuçi u ndërpre nga njëra prej gazetareve e cila i drejtoi pyetjen: Veliaj edhe më shumë i suksesshëm se Rama?
Kreu i grupit të socialistëve duket se e kuptoi menjëherë gabimin e tij, ndërsa shtoi se e kishte vetëm për vitet e fundit,"Jo në këto vite thashë... që kur qeverisim së bashku dhe në nivel qendror dhe lokal"
Gazetarët po ashtu e pyetën nëse Veliaj po e nderon Partinë Socialiste dhe me arrestimin e tre drejtorëve, Mariglent Qato, Taulant Tusha dhe Redian Molla. Përgjigja e Çuçit ishte se "nuk na nderon arrestimi i drejtorëve, por duhet të presim të mos nxitohemi të presim fjalën e fundit të drejtësisë.", ndonëse Apeli i GJKKO, siç përmendëm edhe më sipër i ka rënduar akuzat ndaj tyre. Ndërsa SPAK ka sekuestruar disa ditë më parë edhe kompaninë "5D".
