“Nga 38 euro për ton sot paguajmë 93 euro”, Këlliçi nxjerr dokumentin e zhdukur të Bankës Botërore për pastrimin e Tiranës

Foto ilustruese

TIRANË- Anëtari i Kryesisë së Partisë Demokratike, Belind Këlliçi publikoi dokumentin e vitit 2014 të Bankës Botërore që kishte të bënte me pastrimin e Tiranës, që Veliaj e përdor si alibi për të justifikuar planin për ngritjen e inceneratorit dhe rritjen e tarifës për pastrimin e Tiranës.

Këlliçi i ftuar në emisionin “Të Paekspozuarit” në MCN TV, u shpreh se ky dokument ishte zhdukur dhe se atij i kishte rënë në dore para pak ditësh. Ai tha se ky dokument është studimi i fizibilitetit të IFC-së i vitit 2014, i Bankës Botërore. Këlliçi shtoi se ky studim parashikonte pastrimin e Tiranës, mbledhjen e mbetjeve, zgjerimin e landfillit të Sharrës, depozitimin dhe përpunimin e tyre dhe bënin të gjithë këtë proces për 250 mijë tonë në vit me 38 euro për ton.

“Ky dokument nuk gjendet është zhdukur dhe mua më ka rënë në dorë para pak ditësh. Është studimi i fizibilitetit të IFC-së i vitit 2014, i Bankës Botërore. Veliaj thoshte se e ka patur që ishte një tarifë prej 38 euro për tonë për pastrimin e Tiranës, për të cilën ne paguajmë 16 milionë euro në vit.

Ky studim parashikonte pastrimin e Tiranës, mbledhjen e mbetjeve, zgjerimin e landfillit të Sharrës, depozitimin dhe përpunimin e tyre dhe bënin të gjithë këtë proces për 250 mijë tonë në vit me 38 euro për ton.

Ne paguajmë Eco Tirana. Paguajmë 16 milionë euro për mbledhjen dhe koshave. 16 milionë euro për 250 mijë tonë, shkon 64 euro për tonë. Plus 29 euro për ton për depozitim, vetëm pastrimi për 250 mijë tonë, e ka çuar në 93 euro për tonë, pastrimin e Tiranës. Është vjedhje e paimagjinueshme,” tha Këlliçi.

kellici veliaj