Nis sot votimi i diasporës, Rama: Vota e shqiptarëve në Europë dhe botë peshon sa vetë mundësia historike për ta bërë Shqipërinë anëtare të BE

edi rama

TIRANË- Kryeministri Edi Rama ka reaguar lidhur me nisjen e procesit të votimit të shqiptarëve që banojnë jashtë vendit. Rama shprehet në postimin e tij në rrjetet sociale se vota e diasporës ka hyrë përfundimisht në jetën demokratike të Shqipërisë. 

Ai thotë se vota e shqiptarëve të Europës dhe botës në këto zgjedhje peshon sa vetë mundësia historike për ta bërë Shqipërinë anëtare të Bashkimit Europian.

POSTIMI I RAMËS: 

VOTA E DIASPORËS KA HYRË PËRFUNDIMISHT NË JETËN TONË DEMOKRATIKE

Sot, në orën 07:15, zgjedhësi i parë nga jashtë vendit, me vendbanim në Erlangen, Gjermani, votues në qarkun Dibër, ka marrë në shtëpi zarfin me fletën e votimit nga Komisioni Qendror i Zgjedhjeve!

NE E MBAJTËM FJALËN, TANI U TAKON SHQIPTARËVE TA PËRDORIN VOTËN E TYRE

Vota e shqiptarëve të Europës dhe botës në këto zgjedhje është historike jo vetëm në vetvete, po edhe sepse peshon sa vetë mundësia historike për ta bërë Shqipërinë tonë anëtare të Bashkimit Europian, duke mbyllur negociatat me BE-në brenda 2027

VOTO 5, mu në mes të fletës së votimit ku është kolona #PartiaSocialiste #EdiRama dhe jepe edhe ti dorën tënde për ta ngjitur flamurin më të bukur në botë në majën ku gjendet Shtëpia e Europës së Bashkuar

Ishte kreu i Komisionit Qendror të Zgjedhjeve, Ilirjan Celibashi, i cili përmes një postimi në "Facebook" ka njoftuar se votimi jashtë vendit ka nisur ditën e sotme. Celibashi u shpreh se sot në Erlangen në Gjermani është marrë fleta e votimit nga KQZ për një zgjedhës jashtë vendit. Ai tha se fleta e votimit ka arritur në orën 07:15 për një zgjedhës nga qarku i Dibrës i cili jeton në Gjermani, ndërsa e ka cilësuar si një hap të rëndësishëm për përfshirjen e shqiptarëve në procesin e zgjedhjeve të 11 majit.

edi rama