"Parti me babin në krye të listës", Lapaj pas deklaratës së Ramës: Do muhabet por jam i zënë në takime! Të pres në debat kur të duash

edi rama, adriatik lapaj

TIRANË- Kryeministri Edi Rama në një takim ditën e sotme në Lushnje, ironizoi koalicionin e Adriatik Lapajt "Nisma Shqipëria Bëhet", ku në listën e mbyllur të qarkut të Beratit ishte vendosur si kandidat dhe babai i tij.

“I kemi dhënë njerëzve partinë më të re në garë dhe me mundësitë që të rinjtë të shkojnë në parlament se parti të re me të gjithë kushërinjtë dhe babain në krye të listës mund të bëjë çdo kush por edhe të bërtasë jemi rinia dhe të shajë mbarë e prapë njësoj si pleqëria.", tha Rama. 

Pas deklaratës së kryeministrit ka reaguar edhe drejtuesi i "Nisma Shqipëria Bëhet", përmes një postimi në rrjetet sociale. Lapaj e ftoi kryeministrin në debat, ndërsa shkruan se për “muhabete nuk ka kohë, pasi është i zënë”.

“Z. Rama do muhabet, por jam i zënë me takime. Të pres në debat! Të pres kur të duash e ku të duash”, shkruan Lapaj.

Më herët gjatë ditës në një tjetër reagim në rrjetet sociale, Lapaj shprehet se vendimi i tyre për të garuar me lista të hapura ka "tërbuar gjithë pengmarrësit e Tiranës". 

“Vendimi ynë i guximshëm për të garuar me LISTA TË HAPURA ka tërbuar gjithë pengmarrësit e Tiranës. Personalisht garoj në listë të hapur i 18 në Tiranë. Këta kryetarët e tjerë përse e kanë futur veten te listat e sigurta? Në politik hyra për të imponuar garën si standard. Balta e tyre na shton ushqimin e rrënjëve tona”, thuhet në postimin tjetër të Lapajt.

Dy ditë më parë, Lapaj pati edhe një përgjigje për kritikat për plotësimin me kandidatë fiktivë të pjesës së mbyllur të listave për zgjedhjet parlamentare të 11 majit. Lapaj shprehej se ky plotësim i pjesës së mbyllur së listës me garues fiktivë, ka si qëllim që kandidatët e vertetë të koalicionit të testohen drejtpërdrejtë në elektorat. 

edi rama adriatik lapaj