Një tjetër eurodeputet i Parlamentit Europian ka reaguar i indinjuar ndaj dhunës së policisë me urdhër të kryeministrit...
POLITIKE
“Qeveria refuzon tre nismat ligjore të opozitës”, Bozdo: Pushteti përfiton miliona nga karburanti, shqiptarët po varfërohen nga rritja e çmimeve
PiranjatPërditësimi i fundit 6 Maj 2026, 10:33
Deputeti i Partisë Demokratike, Enno Bozdo, ka akuzuar qeverinë se po refuzon të ndërmarrë masa për lehtësimin e barrës ekonomike ndaj qytetarëve, duke rrëzuar, sipas tij, tre nisma ligjore të opozitës që synonin uljen e çmimeve të karburanteve dhe energjisë për familjet dhe bizneset.
Në një deklaratë për mediat, Bozdo u shpreh se qeveria e drejtuar nga Edi Rama nuk qeveris në interes të qytetarëve, por të një rrethi të ngushtë përfituesish, ndërsa theksoi se kjo situatë, sipas tij, është reflektuar edhe në votimin kundër nismave të propozuara nga grupi parlamentar i Partisë Demokratike.
Ai tha se propozimet e opozitës parashikonin uljen e taksave mbi naftën dhe dieselin, reduktimin e akcizës, si dhe heqjen e akcizës për gazin industrial të prodhimit vendas. Sipas tij, miratimi i këtyre masave do të sillte ulje të ndjeshme të kostove të jetesës dhe prodhimit. Bozdo pretendoi se, sipas llogaritjeve të opozitës, çmimi i naftës do të ishte ndjeshëm më i ulët, duke sjellë kursime mujore për familjet shqiptare, ndërsa fermerët dhe industria prodhuese do të përfitonin nga ulja e kostove të punës dhe rritja e konkurrueshmërisë.
Ai shtoi gjithashtu se Shqipëria vijon të renditet ndër vendet me çmimin më të lartë të karburantit, çka sipas tij po ndikon negativisht në ekonominë familjare dhe sektorin e prodhimit. Deputeti demokrat ngriti akuza edhe për menaxhimin e të ardhurave nga TVSH-ja e karburanteve, duke pretenduar se vetëm në muajt e fundit janë mbledhur miliona euro shtesë, të cilat, sipas tij, nuk janë përdorur për mbështetjen e qytetarëve. Në përfundim, Bozdo i bëri thirrje shumicës parlamentare që të votojë në seancën plenare pro nismave të opozitës, duke i cilësuar ato si masa konkrete dhe të domosdoshme për lehtësimin e krizës së kostos së jetesës në vend.
DEKLARATA Përshëndetje, E kam thirrur këtë komunikim për median për një çështje thelbësore që prek drejtpërdrejt jetën e përditshme të qytetarëve shqiptarë sic wshtw ekonomia. Qeveria e Edi Rama, përgjatë këtyre 13 viteve, ka provuar vazhdimisht se nuk qeveris për qytetarët, por për një rreth të ngushtë interesash dhe përfituesish pranë saj. Ky nuk është më perceptim, është fakt i përsëritur dhe i konfirmuar. Kjo sjellje u shfaq sërish, në mënyrën më të qartë dhe më të papranueshme, gjatë javës së fundit, kur maxhoranca rrëzoi tre nisma ligjore të Grupit Parlamentar të Partisë Demokratike, nisma që synonin drejtpërdrejt lehtësimin e barrës ekonomike për qytetarët në një kohë krize të thellë të rritjes së çmimeve. Në fakt, nuk ishte aspak surprizë. Është modeli i tyre i zakonshëm i qeverisjes. Ata rrëzuan propozimet për uljen e çmimit të naftës përmes reduktimit të taksës së qarkullimit dhe taksave të tjera, për uljen e akcizës mbi naftën dhe dieselin, si dhe për zerimin e akcizës së gazit për industrinë prodhuese “Made in Albania”. Të gjitha këto masa u hodhën poshtë në komisionet parlamentare me votat e deputetëve socialistë. E theksoj qartë: nuk ka asnjë surprizë në këtë qëndrim. Por ajo që qytetarët duhet të dinë është çfarë humbën nga ky refuzim: • Litri i naftës sot do të ishte të paktën 350 lekë të vjetra më i lirë. Me fjalë të thjeshta: për çdo 10 litra, qytetarët do të kursenin rreth 3500 lekë të vjetra, ose do të merrnin rreth 3 litra më shumë karburant; • Gazi industrial për prodhimin vendas do të kushtonte zero lekë për kg, nga 125 lekë/kg që kushton sot; • Çdo familje shqiptare do të kursente mesatarisht rreth 70 euro në muaj; • Fermerët do të kishin mundësi reale të punonin tokën e tyre, ndërkohë që sot, me çmimin absurd prej 2200 lekësh për litër, kjo është bërë praktikisht e pamundur; • Industria prodhuese, veçanërisht ajo eksportuese, do të ulte kostot deri në 25%, duke u bërë më konkurruese si në tregun vendas ashtu edhe në eksport. Ky është realiteti. Dhe ajo që e bën edhe më të rëndë këtë situatë është fakti se Shqipëria vazhdon të renditet ndër vendet me çmimin më të lartë të karburantit në botë, një politikë që po shkatërron fermerët dhe po godet rëndë ekonominë familjare dhe prodhuese. Refuzimi i këtyre nismave është një zgjedhje e pastër politike. Është vendimi i një qeverie që nuk ka asnjë vullnet për të ndërhyrë në mbrojtje të qytetarëve. Përkundrazi, Edi Rama ka zgjedhur të mos marrë asnjë masë konkrete për të përballuar krizën e çmimeve, duke i lënë familjet shqiptare dhe ekonominë vendase në mëshirë të fatit dhe zhvillimeve të konfliktit ne Lindjen e Mesme. Kemi edhe një tjetër rekord negativ: kjo është e vetmja qeveri në rajon dhe në Evropë që nuk ka ndërmarrë asnjë paketë reale mbështetëse kundër krizës. Ndërkohë, ajo ka përfituar financiarisht nga rritja e çmimeve. Vetëm nga TVSH-ja mbi karburantin, për muajt mars dhe prill, janë mbledhur mbi 10 milionë euro shtesë. Pyetja është e thjeshtë: ku kanë shkuar këto para? Në vend që t’u kthehen qytetarëve si mbështetje direkte, ato kanalizohen në kontrata dhe marrëveshje të dyshimta korruptive apo ne shpenzime luksi. Pra, ndërsa qytetarët varfërohen dhe ekonomia ka ngecur, qeveria pasurohet dhe refuzon të ndajë këtë barrë me njerëzit. Megjithatë, këto tre projektligje do të paraqiten për votim në seancën e nesërme plenare. Thirrja jonë është e qartë: maxhoranca duhet të tejkalojë interesat e saj politike dhe të votojë në favor të qytetarëve. Këto nuk janë propozime partiake. Nuk janë propagandë dhe as ide të parealizueshme. Janë masa konkrete, të provuara në vende të tjera, që japin rezultate të menjëhershme dhe të prekshme për familjet, fermerët dhe prodhuesit shqiptarë. Është momenti për të zgjedhur: interesin e qytetarëve apo interesin e një pakice. Ju faleminderit.
