Takimi me emigrantët në Athinë në një datë me arrestimin e Belerit, Rama flet për mediat fqinje: Histori e politikës greke, s’ka lidhje me ne!

Rama

ATHINË- Kryeministri Edi Rama ka dhënë një prononcim të shkurtër për mediat greke pas takimit të sotëm të zhvilluar në Athinë me emigrantët shqiptarë. Rama është pyetur nga gazetarët grekë nëse takimi i sotëm kishte lidhje me kryebashkiakun e zgjedhur të Himarës, Fredi Beleri pasi sot mbushet fiks një vit nga arrestimi i tij.

Rama duke iu përgjigjur pyetjes është shprehur se nuk ka një lidhje të tillë, ndërsa shtoi se kjo është histori e politikës greke dhe jo e jona.

“Nuk ka çështje të tillë, nuk është histori për ne. Kjo është histori e politikës greke. Nuk është historia jonë dhe nuk ka të bëjë me ne”, tha Rama.

Kryeministri gjithashtu është pyetur edhe për marrëdhëniet  greko-shqiptare, ku tha se shpreson që të arrijnë diçka që përputhet me marrëdhëniet fantastike mes njerëzve të zakonshëm të Greqisë dhe Shqipërisë.

“Shpresoj se do të arrijmë të bëjmë diçka që përputhet me marrëdhëniet fantastike mes njerëzve të zakonshëm të Greqisë dhe Shqipërisë. Ata meritojnë më mirë dhe ne duhet t’u japim politika shumë të ndryshme.”

edi rama ne athine