Prokuroria e Fierit ka përfunduar hetimet dhe ka dërguar në gjyq Ermalinda Ramën, e akuzuar për vrasjen e babait të saj, Anesti ...
POLITIKE
"Të gjithë autokratët bien", Tabaku: Industria dhe bujqësia janë në falimentim, Rama instaloi diktaturën e korrupsionit
PiranjatPërditësimi i fundit 20 Shkurt 2026, 19:03
Ka nisur protesta kombëtare e Partisë Demokratike të Shqipërisë në sheshin para Kryeministrisë, ku qindra qytetarë dhe mbështetës të opozitës janë mbledhur për të shprehur qëndrimet e tyre kundër qeverisë.
Fjalën e radhës në tubim e mbajti deputetja Jorida Tabaku, e cila u shpreh e emocionuar përpara mbështetësve demokratë.
“Të dashur qytetarë, demokratë, në këto vite kam folur në shumë salla, por kurrë nuk jam emocionuar si kur flas para demokratëve, njerëzve të lirë,” tha Tabaku në nisje të fjalës së saj.
Ajo kujtoi rrëzimin e monumentit të diktatorit si një moment kyç në historinë e vendit. “Rrëzimi i monumentit të diktatorit ishte çasti i kthesës së madhe për ne, ishte fundi i një horrorri e diktature të pamëshirshme. Ky ishte triumf. Të gjithë diktatorët dhe autokratët bien. Të gjitha monumentet e tyre rrëzohen në këmbët e njerëzve të lirë. Drita e gjen rrugën e saj gjithnjë. Liria triumfon gjithmonë, edhe në errësirën e diktaturës,” deklaroi ajo.
Në vijim, Tabaku akuzoi kryeministrin Edi Rama se ka ndërtuar një sistem që, sipas saj, favorizon një pakicë të privilegjuar në kurriz të qytetarëve. “Sot jemi përballë një autokrati të rilindur. Sistemi i dikurshëm i dhunës zëvendësohet sot me dhunën e korrupsionit, diktaturën e korrupsionit. Është ideologjia e regjimit sot që ka ndërtuar një ekonomi që i shërben vetëm klientëve dhe ofron mundësi për krimin,” u shpreh deputetja.
Ajo shtoi se pasojat, sipas saj, janë dramatike për ekonominë dhe shtresat në nevojë. “Industria dhe bujqësia janë në falimentim. Çdo i varfër e pensionist e di të vërtetën. Sot të korruptuarit bëjnë ligje që të mbrojnë njëri-tjetrin. Kjo nuk është Shqipëria e shqiptarëve. Familjet e thjeshta numërojnë qindarkat, shtresa e mesme po shtypet, taksat po shtohen, ndërsa ata lart ushqehen me privilegje që nuk u kthehen qytetarëve,” deklaroi ajo.
