Një ngjarje e rëndë ka ndodhur në qytetin e Korçës, ku një 62-vjeçar ka humbur jetën pasi është ...
POLITIKE
U arrestua me urdhër të SPAK/ Kush është Erion Veliaj? Politikani që nuk tha dot "Mjaft"
PiranjatPërditësimi i fundit 10 Shkurt 2025, 21:21
Erion Veliaj
TIRANË - Kryetari i Bashkisë së Tiranë, Erion Veliaj u arrestua mesditën e kësaj të hëne me urdhër të Prokurorisë së Posaçme Antikorrupsion, SPAK pas një hetimi pasuror që kishte nisur ndaj tij. Në një reagim zyrtar SPAK komunikoi zyrtarisht akuzat që rëndojnë ndaj kryebashkiakut Veliaj dhe bashkëshortes së tij Ajoxa Xoxa të cilët akuzohen për korrupsion me fondet publike.
Sipas SPAK nga hetimet ka rezultuar se Veliaj në bashkëpunim me bashkëshorten e tij kanë vënë në funksionim një mekanizëm që ka synuar dhe ka bërë të mundur, marrjen e përfitimeve të parregullta, nga fondet publike që administrohen nga Bashkia Tiranë, me qëllim pasurimin personal dhe familjar.
Ndaj Veliajt është caktuar masa "Arrest me burg" ndërsa ndaj bashkëshortes së tij Ajola Xoxës është caktuar "Arrest në shtëpi".
Po kush është Erion Veliaj?
Erion Veliaj ka lindur në Tiranë, më 17 Dhjetor 1979, studimet Bachelor i ka kryer për Shkenca Politike në Grand Valley State University në Miçigan të Shteteve të Bashkuara të Amerikës. Më pas ai përfundoi studimet Master në Mbretërinë e Bashkuar pranë University of Sussex, me fokus tek Integrimi Europian. Futja e tij në politikë erdhi pas një angazhimi të gjatë në shoqërinë civile, organizata ndërkombëtare dhe media.
Në vitin 2003, Erion Veliaj së bashku me një grup të rinjsh themeloi lëvizjen “MJAFT”, të cilën e drejtoi për plot 4 vite, deri në nëntor të vitit 2007. Shënjestra e kësaj lëvizje deri në vitin 2005 ishte thyerja e karriges së Fatos Naonos në qeveri dhe veçanërisht në krye të PS. Asokohe gjithçka ishte e nxitur dhe për llogari të planeve të Edi Ramës. Veliaj, drejtues i "MJAFT" deklaronte asokohe se "Politika u ka zënë frymën njerëzve".
Por pasi Edi Rama mori drejtimin e PS, Lëvizja “Mjaft” e Veliajt u shpërbë. Me rastin e zgjedhjeve të vitit 2009 Veliaj krijoi partinë "G99", e cila nuk e fshehu se ishte një shtojcë e PS-së së Ramës. Edhe pse e vendosi veten të parin në listat e partisë në të gjithë vendin, Veliaj, nuk u fut dot deputet. Bashkë me përfaqësues të tjerë "G99" Veliaj protestonte kundër qeverisë së Fatos Nanos për krizën e energjisë elektrike. "Duam azik elektrik" ka qënë një ndër pankartat e protestës së asaj kohe.
Pas kësaj Edi Rama e shpërbleu, duke e futur në vitin 2011 në strukturat drejtuese të PS. Ai u bë anëtar i kryesisë së Partisë Socialiste të Shqipërisë dhe Sekretar për Rininë dhe Emigracionin.
Më vonë në zgjedhjet lokale të vitit 2015, Edi Rama, e caktoi Erion Veliajn për kryetar të bashkisë së Tiranës. Në fushatë Veliaj premtoi zero beton dhe zero ndërtime brenda unazës dhe brenda kryeqytetit, ai premtoi gjelbërim dhe mbjelljen e miliona pemëve por këto premtime nuk u mbajtën.
Erion Veliaj që premtoi dyfishim të hapësirave të lira në kryeqytet do mbahet mend si 'zaptuesi' i këtyre hapësirave publike. Erion Veliaj u premtoi qytetarëve transport publik falas por edhe këtë premtim nuk e mbajti. Rriti çmimin e biletës me 10 lekë duke premtuar ndryshime të mëdha cilësore në shërbimin urban, por sot ky transport publik është kthyer në kaos.
Veliaj premtoi dëmshpërblim për familjet, shtëpitë e të cilave u prishën nga Projekti i Unazës dhe rindërtim të shtëpive për ato familje që u prekën nga tërmeti. Por sërish këto premtime nuk u mbajtën. Më vonë një tjetër skandal përfshiu Bashkinë e Tiranës, e njohur si afera "5D". Disa zyrtarë të Bashkisë u akuzuan për korrupsion pasiv dhe shkelje të pabarazisë me tendera.
Dhe së fundmi skandali që çoi në pranga Veliajn ishte pikërisht hetimi pasuror që nisi nga Prokuroria e Posaçme SPAK kundrejt kryebashkiakut dhe bashkëshortes së tij Ajola Xoxës, të cilët akuzohen për korrupsion me fondet publike. Pra Erion Veliaj, themeluesi i Lëvizjes "MJAFT", i cili erdhi si një nismëtar i ndryshimit, nuk u tha dot "MJAFT" aferave korruptive.
